Acusan a Atalaya Mining de "insultar e menosprezar" aos detractores da mina de Touro

O acto de presentación da apertura da mina de Touro deste martes trouxo consigo máis polémica e botou máis leña ao lume, nun proxecto xa de seu controvertido ao redor das graves consecuencias ambientais que carrexa a súa posta en marcha. Foi o conselleiro delegado da principal empresa accionista, Atalaya Mining, quen ocupou o foco de atención nos últimos días, tras tachar de “iluminados” á maioría de detractores do proxecto e reafirmarse na futura aprobación da explotación mineira.

A través dun comunicado, Aldea Viva denuncia que Alberto Lavandeira utilizase o acto “para insultar e menosprezar á xente, veciños e comunidade científica” que se pronuncian contrarios á mina de Touro, tras acusarlles o conselleiro delegado non só de “iluminados”, senón tamén de manter posicionamentos “ideolóxicos” para defender os seus intereses.

A asociación tilda de “publicitario” o acto da empresa mineira, ao obviar os perigos que implican a acidificación, a presenza de enormes balsas de lodos preto de núcleos de poboación e con posible risco de falla, e a contaminación xeral que se exercerá sobre a potabilidade da auga e os ecosistemas próximos, entre outros.

Aldea Viva acusa á empresa ademais de evitar pronunciarse sobre o estudo económico, un que, de acordo a “profesores da Universidade de Santiago de Compostela como Xoan Doldán” foi cualificado de “inexistente”, no que non se detallan os datos mínimos para elaborar unha análise económica e en que permanecen erros como “extrapolar á minería metálica datos correspondentes a outro tipo de actividades extractivas nas que a transformación do produto faise na propia comunidade”.

Ante as recentes actuacións de Atalaya Mining, Aldea Viva pide de novo que na tramitación de autorización do proxecto, a Administración “aplique o principio de prudencia e cautela” e informe “desfavorablemente” o estudo de impacto ambiental.