Accidente laboral en Salvaterra do Miño: ferido grave tras precipitar desde a cuberta dunha nave
A.G.F., de 56 anos, precipitouse esta mañá desde unha altura de 9 metros. Os equipos de emerxencia trasladárono en helicóptero ao Hospital Álvaro Cunqueiro.
Un traballador de 56 anos de idade, A.G.F., resultou ferido grave este luns tras precipitar desde unha altura duns 9 metros, cando se atopaba na cuberta dunha nave en Salvaterra do Miño (Pontevedra).
Segundo informou o CIAE 112 Galicia, o sinistro produciuse sobre as 12,10 horas, cando o operario estaba a colocar un canlón. Un particular chamou a Emerxencias para alertar de que o ferido necesitaba asistencia sanitaria urxente.
Ao mesmo tempo, o 061 comunicou a mobilización do seu persoal a bordo do helicóptero con base en Ourense, aínda que finalmente o traballador foi trasladado ao Hospital Álvaro Cunqueiro de Vigo en ambulancia de soporte vital básico medicalizada, con persoal de Atención Primaria.
No operativo, ademais do persoal de Urxencias Sanitarias, participaron efectivos da Garda Civil e de Policía Local de Salvaterra.
Escribe o teu comentario