Hospitalizado e con custodia policial o lucense investigado por asasinar á súa nai a puñaladas

Un día despois do seu arresto, J.J.R.N. , de 45 anos e con problemas psiquiátricos, permanece ingresado no Hospital Universitario Lucus Augusti despois de que as autoridades o detivesen en relación ao asasinato da súa nai, M.N.N., de 76 anos de idade, á que, presuntamente, quitaría a vida cunha arma branca tras sufrir un brote psicótico. A súa estancia no hospital lucense atrasa a súa declaración ante o Xulgado de Insutrcción.

SUCESOS

Ata que non se normalice a situación médica do investigado non se procederá a tomarlle declaración polo ocorrido. A nai do presunto agresor foi atopada polo marido e pai do agora ingresado na área de Psiquiatría do HULA. A pesar da intervención dos sanitarios, a agredida faleceu tras ser trasladada ao hospital polas puñaladas que sufrira. 

Os feitos ocorreron nun domicilio da Praza de Bretaña e tras o aviso ás autoridades procedeuse a tratar de localizar ao investigado, que non se atopaba na vivenda tras o ocorrido. Foi localizado na rúa cando ía dirección á estación de autobuses. 

A investigación permanece aberta nestes momentos baixo segredo de sumario e a muller será enterrada este martes pola tarde no cemiterio municipal despois do funeral, que se oficiará na igrexa da Nova.