Atropelan a un mozo en Boiro e a policía local investiga os feitos

Un mozo foi atropelado no centro urbano de Boiro  por un coche que, segundo puido saber o 112 Galicia a través de testemuñas do accidente, continuou a súa marcha. Deste xeito, os axentes da Policía Local investigan os feitos.

Ademais, pouco despois, a central de emerxencias soubo por unha chamada da presenza dun coche cun golpe no parabrisas cerca do cemiterio, o que foi posto en coñecemento do corpo policial. Na información proporcionada esta mañá, o 112 sinala que este vehículo era o implicado no accidente.

O suceso produciuse apenas uns minutos despois das 23.00 horas da noite do sábado nun paso de peóns diante do Concello; concretamente, na Rúa Principal de Boiro, por onde pasa a estrada comarcal AC-305.

Varias persoas foron testemuñas do atropelo e indicaron ao servizo de emerxencias a posibilidade de que o ferido estivese inconsciente. Os profesionais de Urxencias Sanitarias de Galicia-061 xa foran informados e enviaron unha dotación ao lugar do accidente. Posteriormente, trasladaron o ferido ao Hospital do Barbanza.

A pesar de que o mozo estaba liberado e accesible, o 112 Galicia solicitou a colaboración dos membros do Servizo Municipal de Protección Civil. Pola súa banda, os axentes da Policía Local investigan os feitos, xa que todas as testemuñas coincidían na marcha do condutor do vehículo.