Artillaría e radares da Armada na costa de Pontevedra para contralar os barcos que pasan fronte Galicia

O Rexemento de Artillaría de Costa número 4 (RACTA 4) iniciou na provincia de Pontevedra un despregamento da súa Unidade de Defensa de Costa (UDACTA I/26) dentro das operacións permanentes de vixilancia marítima que desenvolve a Armada española. A actividade, que se manterá durante os próximos días, persegue manter unha observación en tempo real do tráfico marítimo na contorna galega e detectar de forma temperá calquera movemento sospeitoso.

Máis dun centenar de efectivos, apoiados con pezas de artillaría, medios loxísticos como radares e equipos de mando, atópanse repartidos por diversas zonas municipais próximas ao litoral. Estas manobras desenvólvense en coordinación coas autoridades locais pontevedresas e coa colaboración da Brigada “Galicia VII” (#BRILAT), cuxa base principal se atopa en Figueirido.

O obxectivo deste operativo é reforzar a seguridade marítima na comunidade autónoma e pór a proba a capacidade expedicionaria das Forzas Armadas ante posibles escenarios de risco. Durante o despregamento controlarase o tráfico marítimo e notificarase calquera actividade sospeitosa detectada nas costas galegas.

Hai que ter en conta que A dark fleet rusa, unha flota clandestina de buques que elude sancións internacionais manipulando os seus sistemas AIS, falsificando posicións GNSS e operando con estruturas opacas, representa un crecente problema para Galicia ao transitar frecuentemente polas súas costas atlánticas en rutas cara a portos asiáticos ou africanos cargados de petróleo sancionado. Son buques, ademais, que a miúdo non están en boas condicións porque se teme que poidan acabar provocando un novo Prestige . 

Unha operación loxística de gran envergadura

A chegada do RACTA 4 a Galicia implicou un complexo movemento loxístico desde os seus acuartelamentos de orixe en San Fernando e Tarifa (Cádiz), máis de mil quilómetros ao sur. Este traslado de material pesado, vehículos e persoal pon a proba a capacidade operativa da unidade para despregar con rapidez en calquera punto do territorio nacional.

O despregamento temporal en Pontevedra permitirá á unidade adestrar nunha contorna xeográfica diferente ao habitual, adaptando os seus sistemas de detección, artillaría e comunicacións ás particularidades da costa atlántica. Fontes da Armada subliñan que este tipo de operacións non afectan á vida diaria dos municipios, xa que se planifican en colaboración coas administracións locais para evitar molestias á poboación.

Pola súa banda, os equipos da #BRILAT realizan tarefas de protección, apoio loxístico e coordinación co dispositivo principal de artillaría, reforzando así a cooperación entre unidades asentadas en Galicia e as procedentes doutras comunidades.

Supervisión do Mando Operativo Marítimo

A operación en Pontevedra enmárcase dentro das actividades do Mando Operativo Marítimo (MOM), con sede en Cartaxena, baixo a dirección do vicealmirante Vicente Cuquerella Gamboa. Este organismo forma parte da estrutura permanente das Forzas Armadas e coordina as Operacións de Presenza, Vixilancia e Disuasión (OPVD) nos espazos marítimos de soberanía española.

O RACTA 4, dependente deste mando, é a principal unidade de artillaría costeira do país e dispón de sensores, radares e sistemas de comunicación avanzada para garantir o control do litoral e a detección de ameazas desde terra. Segundo a información facilitada pola Armada, este despregamento demostra a capacidade de España para protexer as súas costas e manter unha vixilancia constante sobre as rutas marítimas de interese estratéxico.