O mar alimentado polas continuas choivas alaga a autovía PO-11 entre Pontevedra e Marín

A forza do mar e as choivas intensas obrigaron este luns a cortar a autovía PO-11, que une Pontevedra con Marín, despois de que as ondas e a auga invadisen os catro carrís da calzada. A situación, provocada polo temporal que azouta a Galicia desde o fin de semana, deixou a circulación interrompida en ambos os sentidos desde a madrugada e sen previsión inmediata de reapertura.

O 112 Galicia confirmou que a estrada continúa pechada mentres equipos de Protección Civil, Garda Civil e Policía Local traballan sobre o terreo. Os efectivos tentan achicar a auga acumulada con bombas mentres se manteñen os desvíos no nó de Mollavao e a rotonda de Praceres, segundo informou a Dirección Xeral de Tráfico (#DXT).

O corte empezou ás 4 da mañá segundo sinala a web de incidencias d ela DXT.

As autoridades habilitaron alternativas pola PO-546 (antiga estrada de Marín) e a VG-4.4 (variante de Marín), que conecta coa AP-9 e a PO-10. Rógase aos condutores extremar a precaución e evitar desprazamentos innecesarios ata que se normalice a situación.

Segundo a Axencia Estatal de Meteorología (AEMET), a borrasca situada entre Irlanda e o noroeste peninsular mantén a Galicia baixo aviso laranxa por temporal costeiro. Espéranse ondas de entre cinco e seis metros e ventos de compoñente suroeste de forza sete ou oito, unha combinación que converteu a ría de Pontevedra nun escenario de risco.

A pleamar rexistrada ao redor das 4.00 horas agravou os efectos da crecida do mar, que empuxou a auga até as vías de circulación. No litoral, a Xunta activou a alerta para as provincias da Coruña e Pontevedra, co obxectivo de “garantir a seguridade das persoas e os bens”.

Inundacións en rúas e cortes do transporte por mar

Ademais, o temporal obrigou a cancelar tamén o transporte de ría entre Moaña e Vigo á primeira hora desta mañá. Así, a naviera Pirata de Nabia informou de que as viaxes que partían da localidade de Ou Morrazo ás 06.30, 07.30 e 08.30 horas foron suspendidos, así como os das 07.00, 08.00 e 09.00 que saían de Vigo.

Así mesmo, Mar de Ons avisou de que o servizo regular entre Cangas e Vigo prestarase este luns cada media hora e non coas frecuencias habituais para adecuar a velocidade dos buques ás inclemencias meteorolóxicas entre as 07.00 e as 10.00 horas.

Na cidade de Pontevedra, a rúa Fernando Olmedo tamén amenceu alagada, segundo os Bombeiros, que realizaron varias intervencións durante a madrugada. En apenas oito horas, recolléronse máis de 32 litros de choiva por metro cadrado, chegando a 38 na estación de Lourizán e a 37 no Porto de Marín, segundo Meteogalicia.

Ante as malas condicións marítimas, a Xunta suspendeu toda a actividade deportiva no mar, tanto a federada como a do programa Xogade. As autoridades autonómicas lembraron ademais a importancia de afastar do litoral e revisar amarres e cabos das embarcacións, nun contexto no que varios barcos á deriva acabaron en praias da contorna, como un veleiro encallado en Aguete (Marín).

O episodio súmase a outras incidencias rexistradas nas últimas horas en distintos puntos do litoral galego. En Vigo, A Coruña e Ribeira producíronse acumulacións de auga e fortes refachos de vento, mentres o chamado “tren de borrascas” continúa avanzando polo Atlántico norte. Segundo o parte meteorolóxico, as choivas poderán ser localmente intensas e mesmo tormentosas na metade occidental da comunidade durante o resto do día.