Concentración en Santiago contra a condena ao fiscal xeral: "Tribunal Supremo dimisión"

Máis dun centenar de persoas concentráronse este domingo en Santiago en apoio ao fiscal xeral, Álvaro García Ortiz, tras coñecer a condena do Tribunal Supremo que ordena a súa inhabilitación por dous anos. Cidadáns, a través de distintas consignas, clamaron pola renovación do poder xudicial e a "dimisión" do órgano encargado de ditar sentenza.

'Na xustiza non ao golpe de estado', 'Tribunal Supremo dimisión', 'Se é fascista, non é xustiza', 'Renovación do poder xudicial' e 'Álvaro, amigo, Santiago está contigo' son algunha das frases que se entoaron fronte á Praza do Obradoiro como mostra de apoio a García Ortiz.

Esta concentración cidadá replicouse noutras cidades, como na Coruña, onde se aglutinaron centenares de persoas fronte ao Obelisco. No caso de Santiago, trátase dunha convocatoria difundida por redes sociais sen ningunha entidade ou plataforma detrás, como trasladan varios participantes consultados.

Asistentes, en declaracións a Europa Press, criticaron a condena imposta a García Ortiz por revelación de segredos contra Alberto González Amador, o noivo da presidenta madrileña, Isabel Díaz Ayuso. O antigo reitor da USC, Carlos Pajares, cuestionou o labor xudicial do Supremo: "Ten unha traxectoria de incompetencia e de ser uns 'hooligans' da dereita. Proba diso é que, unha tras outra, as súas sentenzas son revogadas".

Outra asistente, Eva Vidal, tamén cargou contra o órgano encargado de ditar a condena e cualificou a mesma de "inxusta", incidindo en que aínda non se coñece a sentenza. "Queremos unha España democrática e libre", engadiu.

Pola súa banda, Javier reivindicou unha xustiza "máis transparente e menos retorta" tras unha condena que, ao seu xuízo, estaba "cociñada desde o principio". "Este caso é moi simbólico. Máis aló do caso que estamos denunciado, que se empece a propagar e que sexa un 'modus operandi' que nos poida afectar a todos", valorou.

Ademais, á mobilización da capital galega han acudido diferentes representantes políticos, como o secretario xeral de Movemento Sumar Galicia, Paulo Carlos López, e o secretario xeral do PSdeG en Santiago, Aitor Bouza.