Campaña da DXT para o control de furgonetas en Galicia na semana "de maior actividade comercial do ano"

A Delegación do Goberno en Galicia anunciou que a Dirección Xeral de Tráfico (#DXT) iniciará este luns unha Campaña Especial de Control e Vixilancia de Furgonetas, "coincidindo cunha das semanas de maior actividade comercial do ano".

Así, e até o vindeiro domingo, a Agrupación de Tráfico da Garda Civil intensificará as inspeccións sobre os vehículos --autorizacións e documentos, condicións técnicas e elementos de seguridade-- e sobre as persoas condutoras --permiso de condución e alcol--.

Tal e como lembrou a Delegación do Goberno en Galicia nunha nota de prensa, nestas datas increméntanse substancialmente os envíos diarios de mercadorías en España e, a inmensa maioría realízanse neste tipo de vehículos.

Por iso, e co obxectivo de comprobar diferentes aspectos relacionados coa seguridade viaria das furgonetas, a campaña establecerá puntos de control en todo tipo de estradas, especialmente en vías convencionais, así como en zonas próximas a polígonos industriais, zonas de carga e descarga, centros comerciais, entre outros.

Neste contexto, a DXT advertiu de que a condución dunha furgoneta non é igual que a dun turismo e insistiu en que "o comportamento dinámico é diferente, sobre todo se vai cargada". Así mesmo, advertiu de que entre este tipo de vehículos, "é máis alta a incidencia de saídas da vía que pode explicar pola excesiva ou mala colocación da carga".

De feito, subliñou que en Galicia aumentaron en 2024 os sinistros de tráfico con vítimas nos que estiveron implicadas as furgonetas como as persoas falecidas neles. En total, foron sete as persoas que faleceron nestes vehículos, unha cifra superior á do ano anterior.