Rescatan un corpo sen vida flotando en Baredo, Baiona; cuarto episodio idéntico en só 15 días

Desde o pasado día 18 até onte, 31 de maio, foron sacados do mar até catro cadáveres en distintos puntos de Galicia e todos en circunstancias similares. Boiro, A Coruña -por dúas veces- e Baiona reportaron os terribles achados, o último na localidade pontevedresa na tarde do domingo, na parroquia de Baredo.

SUCESO

Os feitos ocorreron ao redor das 19:15 horas nunha zona rochosa do municipio. Foi a Garda Civil a que informou ao 112 Galicia de que fora localizado un corpo sen vida flotando no mar.

Tras a comunicación foron requiridos os servizos de emerxencia para tratar de rescatar o corpo da auga. Até o lugar trasladáronse Salvamento Marítimo, a Garda Costeira Galega, o GES de Val Miñor e a Policía Local de Baiona, así como deuse aviso a Bombeiros de Porriño e voluntarios de Protección Civil de Val Miñor.
 

Foi o helicóptero Pesca I, pertencente aos Gardacostas, o encargado do rescate do corpo sen vida e o seu traslado. Como ocorreu nas anteriores circunstancias antes citadas, as autoridades tratan de esclarecer as causas deste suceso, que vén repetindo de maneira alarmante nas últimas semanas. Neste caso, a sospeita é que o corpo pertence ao home desaparecido o sábado nunha praia en Cangas. Trataríase por tanto dun veciño de Vigo duns 70 anos.