Alertan de tuberculose e falta de enfermeiras na residencia DomusVi de Santiago, onde morreron máis de 50 anciáns por covid

O sindicato Comisións Obreiras indica que hai un brote de tuberculose na residencia Domus Vin San Lázaro, un dos maiores xeriátricos de Santiago de Compostela. 

A central relaciona as infeccións coa suposta falta de medios humanos, en concreto, de persoal de enfermaría.

Os datos que figuran no obrigatorio Rexistro Único de Entidades Prestadoras de Servizos Sociais da Consellería de Política Social  "non se corresponde coa realidade" segundo Comisións. A lei obriga a que polo menos unha das sanitarias estea presente sempre, as 24 horas.

Os denunciantes indican que hai tres enfermeiras inscritas no Rexistro pero argumentan que, aínda que fose certo que hai tres, é insuficiente para garantir a presenza permanente dunha sanitaria, pois logicamente estas teñen dereitos a vacacións, etc.

A central asegura que o déficit non é recente, senón que se arrastra desde hai meses. Os sindicalistas lembran que violar a citada norma está tipificado como "falta grave" na Lei de Servizos Sociais de Galicia.

DUCIAS DE MORTES POR CORONAVIRUS

Dáse a circunstancia de que Domus Vin San Lázaro foi unha das residencias onde máis anciáns morreron durante a pandemia. Máis de 50 residentes faleceron no asilo ou nos hospitais infectadas con coronavirus. Máis de 80 contaxiáronse na primeira onda, nun centro cunhas 150 prazas. 

A Xunta xamais chegou a intervir este centro, a diferenza doutros, con elevadas mortaldades. Familiares queixáronse no seu día da falta de atención pola suposta falta de persoal, problema que se volveu a repetir, segundo a Federación de Sanidade de CCOO. 

No seu día,  o Defensor de Paciente pediu "depurar responsabilidades" ante a suposta falta de medios e puxo como exemplo caso da DomusVi San Lázaro (Santiago). A Fiscalía non abriu ningunha investigación penal sobre o sucedido en DomusVi San Lázaro, a pesar de que o Concello pediu que se investigase. Tres anos despois, ningún caso de residencias durante a pandemia chegou a xuízo en Galicia.

Domus Vin é unha dos maiores operadores privados de xeriátricos, tanto en España como en Galicia. Nos últimos anos, tras a pandemia, renovou a súa dirección. Josefina Fernández, a galega que era a máxima responsable, deixou a presidencia esta primavera. 

Na Comisión de Investigación que houbo no Parlamento de Galicia, Fernández defendeu o labor da súa empresa e do Goberno Galego, mentres a oposición acusaba á Administración de trato favor por suposto amiguismo.