De Beiras a Rosenvinge, así é o programa da Selic 2023, a feira da lectura de Santiago

A SELIC, a Festa da Lectura compostelá, está a piques de empezar e faio cun programa diverso que mestura presentacións de  figuras moi coñecidas para o público adulto (Miguel Anxo Prado, Xosé Manuel Beiras, Joao Afonso ou Cristina Rosenvinge entre outras) con numerosas actividades lúdicas, tanto para maiores e pequenos.

PRESENTACIÓNS DESTE VENRES

Cristina Morales e Miguelanxo Prado serán os protagonistas da xornada inaugural. O coruñés abordará o impacto de Trazo de Xiz, o relato gráfico que supuxo un salto na súa carreira e unha das obras mestras do cómic nas últimas décadas.  Ademais, Carme Varela (Está escuro) e Puri Cabido (Areanegra na casa encantada), falarán das súas obras premiadas.

Un dos pratos fortes da Semana chega mércores 14 da man de Chévere Teatro.  Patricia de Lorenzo, Jesús Ron e Miguel de Lira presentarán a autobiografía da veterana e premiada compañía Chévere en novo libro editado por Kalandraka. Será no escenario que hai na carpa a partir das 20 horas. 

TEATRO

Tamén relacionado co teatro, a obra Doentes (Edicións Positivas), escrita por Roberto Vidal Bolaño, recibirá unha interpretación peculiar mediante un paseo teatralizado o domingo 11 de xuño a cargo de Mónica Camaño e Silda García.

A historia desenvólvese na antiga zona de Compostela, ambientada nos anos 50, cando Francisco Franco decide converter o antigo Hospital Real nun luxoso hotel, o actual Hostal dous Reis Católicos. Nesta historia de perdedores, Don Laureano e Cañete imaxinan un asasinato que nunca chega a ocorrer, o do generalísimo.

FALARÁ BEIRAS DE SUMAR?

Moita expectación levantará sen dúbida a presenza de Xosé Manuel Beiras. Aínda que o ex-líder de ANOVA e BNG leva tempo retirado da primeira liña política, o convulso momento que vive a esquerda estatal ao fío da convocatoria de comicios xerais seguro que suscita algún comentario do veterano profesor. 

Iso si, Beiras en teoría non está chamado a falar de política, senón a presentar os seus Retratos en fite , obra editada en 2022 por Laiovento no que evoca persoas que marcaron o curso da súa vida. Beiras estará no escenario a partir das 17 horas.

MÚSICA

A SELIC achégase ao pop e ao indie da man de Cristina Rosenvinge. A compositora e actriz presenta Debut o xoves a partir das 20 horas cunha "lectura-concerto". Debut é un libro onde a artista reflexiona sobre a súa carreira e a súa obra e supón o seu salto á narrativa.

O cantautor portugués Joao Afonso é outro dos atractivos da SELIC relacionado coa música. O luso presentase Livros un disco libro con textos clásicos da literatura portuguesa convertidos en cancións nun concerto o venres 16 a partir das 20 horas.

Ademais dos eventos -entre os que hai paseos literarios como o que ofrecerá Suso de Toro ao redor do seu clásico Trece Badaladas-, a  Semana do Libro de Compostela que dirixe o xornalista Camilo Franco contará con varias doscenas de expositores permanentes de editoriais, librarías e institucións compostelás relacionadas co libro e a cultura.