Os falecementos por covid repuntan levemente tras comunicar hoxe catro mortes nun só día

A media móbil a 30 días de mortes por covid en Galicia este ano nunca superou os dous falecementos por día, unha cifra moi inferior ás soportadas no pasado.

Con todo, nas últimas semanas apréciase unha perceptible tendencia á alza, tras tocar chan a curva a finais de febreiro. 

A morte de catro persoas nos últimos días elevou a 4.095 o número de falecidos con covid en Galicia desde que se iniciou a pandemia, segundo datos publicados este martes polo Servizo Galego de Saúde (#Sergas).

En concreto, o pasado venres faleceu un home, de 84 anos de idade da área sanitaria de Santiago-Barbanza. Ademais, o sábado morreron dúas mulleres, de 87 e 91 anos de idade e das áreas sanitarias de Lugo, A Mariña e Monforte de Lemos e de Vigo, respectivamente.

Ademais, domingo faleceu unha muller de 100 anos de idade de Vigo. Todas estas persoas tiñan patoloxías previas.

Pola súa banda, na actualidade o número de pacientes con esta infección é de 999, o que supón un descenso de máis de 60 persoas en comparación co luns. Deles, seis persoas están en camas UCI e 177 hospitalizados en unidades convencionais.

Desde o inicio da pandemia, na Comunidade 671.547 persoas superaron o covid e administráronse 7,6 millóns de doses da vacina contra o virus. Ademais, realizáronse 4,06 millóns de probas PCR.