Rueda desmente aos coordinadores de Urxencias do SERGAS: "As súas reclamacións non se axustan á realidade"

As críticas dos coordinadores de Urxencias dos hospitais galegos seguen coleando nos despachos da Consellería de Sanidade e chegaron este luns ao Salón Grande de San Caetano, onde habitualmente comparece ante a prensa o presidente da Xunta, Alfonso Rueda, tras a celebración semanal do Consello da Xunta. Como non podía ser doutra forma, os medios levaron até o mandatario as reclamacións dos profesionais sanitarios para coñecer a resposta dun Rueda que foi tallante na súa réplica: "Non é certo".

UN RELATO QUE "NON SE AXUSTA Á REALIDADE"

Sobre o presunto bloqueo para as contratacións o presidente da Xunta de Galicia recalcou que é unha das reclamacións que, ao seu xuízo, "non se axustan á realidade". "O que escoito dos coordinadores de urxencias non é certo", apresurouse a afirmar o presidente autonómico, defendendo a folla de ruta de Sanidade nesta orde. 

"Reforzáronse as urxencias con 150 médicos máis nesta lexislatura", testemuña Rueda, á vez que puntualiza que se puxeron en marcha "incrementos retributivos de 3.500 euros ao ano de media". Nesa mesma liña, puntualizou que naqueles centros hospitalarios "con máis dificultades" consideraron "medidas extraordinarias" para reforzar Urxencias con, garante, "especial empeño".
 

"Fomos dos que máis apostamos no seu momento pola especialidade, como reclamaban, porque sabiamos que iso era necesario", insiste o presidente do Goberno de Galicia e líder dos populares galegos, que apelou ao "sentidiño" dos urgenciólogos nas súas demandas.