Outra xornada de protestas de profesores convocada para o mércores 6 de maio

O pasado martes 28 de abril tivo lugar en Santiago de Compostela unha gran protesta con miles de docentes na rúa protestando polas condicións na que se atopa a educación pública en Galicia. Mestres, alumnos e familias viviron unha nova xornada de folga nos centros educativos da comunidade, a sexta no que vai de curso e, tras o éxito rotundo valorado polos sindicatos convocantes, CIG-Ensino e STEG, propoñen outro día de mobilizacións dentro dunha semana, o mércores 6 de maio nunha vintena de municipios.

ACORDO SOBRE "UNHA BASE INCORRECTA"

Neste contexto sobrevoa xa a convocatoria da sétima xornada de folga na educación galega no que vai de curso. A este ritmo, e contando as vacacións, practicamente imos a folga por mes no ensino galego durante o curso 25/26, un ritmo que pon de manifesto a urxencia dos docentes, que demandan melloras significativas e inmediatas máis aló das anunciadas polo conselleiro de Educación, Román Rodríguez. 

A semana pasada foi noticia a firma dun acordo entre a Consellería e catro centrais sindicais onde se acordou a redución horaria do profesorado de Secundaria, pasando ás 18 horas lectivas a partir do curso 2026/27, melloras na atención á diversidade ou unha reducacción de cocientes que, no entanto, non se aplicará até 2028. 

Comisións Obreiras, UXT, ANPE e CSIF rubricaron o pactado nunha negociación onde non estiveron presentes nin a CIG, a pesar de ser o sindicato maioritario na mesa sectorial, nin STEG. Así, os sindicatos críticos manifestan que este 'Acordo de Melloras' realizouse sen "constituír un marco válidos de negociacións, dado que parte dunha base incorrecta". "Carece de compromisos explicitos de contratación de profesorado e non foi asinado no seu momento nin por STEG nin pola CIG", recalcan. 

MÁIS FOLGAS?

Precisamente desde STEG fan un novo chamamento a secundar as protestas organizadas de face á próxima semana despois do que catalogan como "un éxito na xornada de folga do 28 de abril", unha xornada á que tamén se sumaron as Asembleas Abertas do Ensino Público, un movemento que se estendeu polos centros educativos do país e que está a favorecer a mobilización do colectivo. 

Ao longo do ano sucedéronse as protestas, as concentracións e, mesmo, os peches dentro da Consellería de Educación, demandando ao conselleiro -ao que afean difundir unhas cifras de participación a propósito de que, segundo STEG, non se corresponden coa realidade- unha reunión que até agora non tivo lugar. 

Desde a central sindical cren que Rodríguez está "inquieto" por ver aos docentes "máis mobilizados que nunca" e sumando muescas a cada xornada de folga que se sucede na educación galega. Segundo os cálculos do sindicato foron ao redor de 5.000 os profesores que protestaron en todas as etapas educativas e especialidades na manifestación na capital galega. 

Coa previsión de que as protestas enmarcadas para a tarde do 6 de maio conten cunha gran acollida, desde STEG subliñan que as voces críticas, representadas polos sindicatos, federacións de ANPAS, sindicatos estudantiis/estudantís e entidades educativas, "seguirán coas mobilizacións mentres os responsables da Consellería non acepten negociar directamente con elas", abrindo desta maneira a porta a máis xornadas de folga.