Galicia amplía a vacina do meningococo B aos adolescentes ante a alza de casos

O Consello da Xunta aprobou este martes a medida, que alcanzará a uns 21.900 adolescentes nados en 2014 e que supón un investimento adicional de 1,8 millóns de euros, elevando o gasto anual nesta vacina a 4,7 millóns. O presidente Alfonso Rueda presentou a decisión en rolda de prensa como o "paso final e necesario" para cumprir co obxectivo da Organización Mundial da Saúde de derrotar a meninxite como problema de saúde pública en 2030.

A vacinación levará a cabo de forma sistemática, coincidindo coa administración doutras vacinas do calendario como a do meningococo ACWY ou a do virus do papiloma humano. Administrarase unha única dose a quen xa teñan a pauta infantil completa —aos dous meses, catro meses e reforzo ao ano de vida—, e dúas dose a quen non a completaron.

A ampliación chega nun contexto epidemiolóxico que xustifica a urxencia. En 2024 identificáronse en España 330 casos de enfermidade meningocócica invasora, dos cales 135 foron causados polo serogrupo B, representando o 42,2% dos casos nos que se identificou o axente responsable. 

O grupo que soporta a maior taxa de incidencia segue sendo o dos menores dun ano, con 4,68 casos por cada 100.000 habitantes debidos ao meningococo B. 

A ameaza do serogrupo B tamén se fixo visible leste mesmo ano cun brote comunitario detectado en Aragón entre xaneiro e febreiro de 2025, con nove casos confirmados, o que supuxo unha incidencia 27 veces superior á rexistrada nesa rexión nos tres anos anteriores. 

Máis recentemente, un brote no condado de Kent, no Reino Unido, que afectou principalmente a estudantes universitarios e causou ao redor de trinta casos e dous falecementos, puxo en alerta ás autoridades sanitarias europeas. 

En Galicia, a situación reflicte unha tendencia máis favorable. Segundo os datos de vixilancia epidemiolóxica de 2025 recolleitos pola Consellería de Sanidade, na tempada 2024-2025 detectáronse cinco casos de enfermidade meningocócica por serogrupo B na comunidade, un deles na franxa de 10 a 14 anos, o grupo que agora se reforza coa nova medida.

UN RETO GLOBAL QUE GALICIA ASUME

A meninxite é moito máis que un problema local. A OMS e os seus socios estiman que a estratexia mundial para derrotar a meninxite podería salvar máis de 200.000 vidas ao ano, co obxectivo de reducir as mortes nun 70% e os casos á metade antes de 2030. 

A maior carga da enfermidade concéntrase no denominado "cinto da meninxite", unha franxa do África Subsahariana formada por 26 países onde o risco de epidemias é moi elevado. Pero a meninxite bacteriana aguda golpea tamén en Europa, con especial crueza en lactantes e en mozas que comparten espazos.

A medida aprobada pola Xunta incorpora ademais un beneficio colateral de saúde pública: a vacina do meningococo B confire un grao de protección cruzada fronte á gonorrea, unha infección de transmisión sexual en alza entre adolescentes e mozos adultos. A Consellería de Sanidade subliña que este efecto protector engade valor á intervención nunha etapa vital de especial vulnerabilidade.

HERPES ZÓSTER E MATERIAL HOSPITALARIO

O mesmo Consello tamén autorizou a adquisición de 130.000 dose da vacina fronte ao herpes zóster por un importe de máis de 16,2 millóns de euros, un 27% máis de dose que na compra anterior, motivado por un incremento superior ao 20% no número de persoas vacinadas. Desde 2023, Galicia inclúe esta vacina para persoas de 65 e 80 anos, así como para grupos de risco. As coberturas melloraron notablemente: a porcentaxe de vacinados con 65 anos pasou do 31,2% en 2023 ao 50,31% na actualidade.