A OMS mantén "estable" o risco de mpox, con Galicia sufrindo un brote con 14 casos confirmados

A OMS informou este luns que os dous casos identificados corresponden a unha cepa do virus das vexigas do mono que combina os clados Ib e IIb do MPXV, unha recombinación xenética que, segundo os expertos, é un fenómeno natural cando dous virus relacionados infectan ao mesmo individuo e comparten material xenético. Por agora, non existe evidencia de que esta cepa teña un comportamento máis agresivo nin de que implique un aumento do risco sanitario.

Os dous pacientes presentaron cadros clínicos similares aos observados en infeccións anteriores, sen complicacións graves. Ambos se recuperaron tras síntomas leves, e as investigacións sobre contactos nos seus respectivos países non detectaron contagios secundarios. O primeiro caso notificouse no Reino Unido, con antecedentes de viaxe ao Sueste Asiático, e o segundo na India, tras unha estancia na Península Arábiga. Segundo a análise de laboratorio, ambos enfermaron con semanas de diferenza, o que podería indicar que esta liñaxe do virus circula máis aló dos casos detectados.

VIXILANCIA

A pesar da recombinación, a organización mantén sen cambios a súa avaliación de risco: moderado para homes con múltiples ou novas parellas sexuais, traballadores sexuais e persoas con varias parellas ocasionais; baixo para a poboación xeral. Este perfil de risco reproduce o patrón descrito durante o brote global de 2022, cando a maioría dos contagios concentráronse en redes sexuais masculinas de contacto estreito.

A OMS subliña que a vixilancia epidemiolóxica e xenómica segue sendo esencial. En varios países europeos —incluída España— os servizos de saúde pública manteñen activos os sistemas de alerta e diagnóstico. En Galicia a Xunta elevou a pasada semana até 14 os casos confirmados na comunidade tras o último brote rexistrado no principio do ano, con homes de entre 27 e 65 anos afectados, unha ducia deles residentes na provincia da Coruña e dúas na de Pontevedra.

PREVENCIÓN

A institución con sede en Xenebra insta os gobernos a manter a capacidade de laboratorio para secuenciar o virus, reforzar as medidas de prevención e control de infeccións, e seguir difundindo información precisa e adaptada ás comunidades máis afectadas. Tamén apela á colaboración cidadá para detectar precozmente síntomas sospeitosos e evitar a estigmatización das persoas contaxiadas.

Desde o inicio do brote mundial de mpox fai máis de tres anos, a OMS insistiu en que a enfermidade —cuxo nome oficial substituíu a “vexigas do mono”— segue sendo prevenible e tratable, especialmente con campañas de concienciación e vacinación específicas. Aínda que os casos se reduciron significativamente respecto de 2022, os expertos advirten de que o virus podería seguir circulando de maneira esporádica en determinados grupos sociais.