506 pacientes feridos en accidentes de tráfico pasaron o ano pasado por HM Hospitais na Coruña

A Unidade de Lesionados de Tráfico de HM Hospitais na Coruña tratou durante o ano 2025 a 506 pacientes vítimas de accidentes de circulación, segundo datos facilitados pola propia entidade privada. Deles, 445 foron atendidos inicialmente no Servizo de Urxencias do Hospital HM Modelo, o centro que actúa habitualmente como punto de entrada deste tipo de casos. O hospital dispón de persoal médico especializado en lesións traumáticas derivadas de sinistros viarios, un perfil que adquiriu relevancia nos últimos anos debido ao incremento de desprazamentos urbanos e ao auxe dos vehículos de mobilidade persoal.

UNIDADE ESPECIALIZADA

O comunicado detalla que no Policlínico HM Matogrande levaron a cabo 7.471 sesións de rehabilitación ao longo do pasado ano, unha cifra que se mantén estable respecto de 2024. Ademais, a unidade contabilizou 1.367 consultas de Traumatología, 137 interconsultas con outras especialidades e 27 intervencións cirúrxicas relacionadas con accidentes de tráfico. 

Estes datos reflicten a continuidade na demanda de atención especializada para pacientes que sofren tanto lesións leves como secuelas máis complexas.

ATENCIÓN MULTIDISCIPLINAR

A doutora Paula Martínez, directora médica de HM Hospitais na Coruña, subliña que a compañía dispón de “todos os medios diagnósticos e terapéuticos necesarios” para tratar de forma integral as lesións derivadas dos accidentes. O enfoque, apunta, baséase na coordinación entre distintos especialistas —traumatólogos, fisioterapeutas e médicos de rehabilitación— para ofrecer un seguimento completo a cada paciente.

Os profesionais da unidade recomendan que calquera persoa implicada nun sinistro acuda a Urxencias dentro das primeiras 72 horas posteriores ao accidente, mesmo se o impacto parece menor. Esta valoración temperá permite realizar probas e descartar danos musculares ou articulares que poden pasar desapercibidos ao principio. Desde o hospital lembran que algunhas lesións cervicais ou lumbares derivadas do “lategazo cervical” poden manifestar días despois do golpe.

Mentres tanto, a DXT mantén as súas campañas de concienciación en Galicia para reducir os sinistros viarios, centradas na velocidade, o uso do cinto e a atención ao volante. O obxectivo común, tanto das autoridades públicas como dos centros médicos, é reducir a cifra de feridos e garantir unha recuperación rápida e segura das vítimas.