Vixiantes de Seguridade volven protestas contra o SERGAS, agora en Ferrol, en vésperas da negociación

Os sindicatos USO e UXT convocan este mércores unha concentración no Hospital Arquitecto Marcide de Ferrol para denunciar a falta de medios, o aumento de agresións e a precariedade laboral que sofren os vixiantes de seguridade do sistema sanitario galego. O malestar do colectivo esténdese por toda Galicia, mentres a Xunta accede a retomar o diálogo tras semanas de protestas.

A mobilización convocada polo USO e a UXT terá lugar este mércores 4 de febreiro ás 11:30 horas ante a entrada principal do Hospital Arquitecto Marcide, en Ferrol. A protesta forma parte do calendario de accións que os vixiantes iniciaron en varios hospitais galegos para esixir unha resposta urxente á onda de agresións e á falta de recursos cos que afrontan o seu traballo diario.

A colectivo denuncia que os profesionais que velan pola seguridade nos hospitais galegos enfróntanse a “situacións de risco sen respaldo nin medios axeitados”, o que vulnera a normativa de prevención de riscos laborais. Reclaman protocolos claros ante agresións, reforzos de persoal nos centros máis conflitivos e unha actualización das súas ferramentas de protección, ademais de melloras salariais que recoñezan o perigo e a responsabilidade do seu labor.

Segundo a Federación de Traballadores de Seguridade Privada do USO (FTSP-USO), o incremento de conflitos en hospitais como o de Ferrol chegou a un punto insosteible. Os sindicatos acusan á Administración sanitaria galega de “abandono de responsabilidades” por manter aos vixiantes en primeira liña sen os recursos suficientes nin protocolos efectivos.

A presión das últimas semanas —con concentracións ante hospitais e ante a propia Consellería de Sanidade— obrigou á Xunta a mover ficha. FTSP-USO confirmou que recibiron unha chamada da Secretaría Xeral Técnica e do gabinete do conselleiro para retomar as reunións este 5 de febreiro.

Reunión coa Xunta, pero sen desconvocar protestas

O obxectivo do encontro será buscar solucións fronte ás agresións, mellorar os medios de traballo e revisar os procedementos de actuación vixentes. Con todo, FTSP-USO asegurou que “non hai acordo nin bases sólidas” e que, por tanto, as mobilizacións seguirán adiante, incluída a concentración deste mércores en Ferrol.

O dirixente sindical recoñeceu que o aspecto económico “é máis complicado, pero non imposible”. A FTSP-USO considera que as próximas licitacións do #SERGAS poderían abrir a porta á inclusión de pluses ou complementos salariais por perigo e responsabilidade, pero denuncia que, até agora, a representación legal dos vixiantes non foi tida en conta no deseño dos protocolos.

Desde ambas as organizacións sindicais esixen á Consellería de Sanidade que “deixe de expor aos vixiantes de seguridade a riscos evitables” e que garanta protección real, recoñecemento profesional e dignidade laboral a un colectivo esencial para o bo funcionamento dos centros sanitarios galegos.