Medicina da USC apoia finalmente a descentralización
A xunta da Facultade de Medicina acordou apoiar o acordo adoptado no Consello de Docencia Clínica --no que están representadas a Xunta e as universidades-- a finais de novembro para descentralizar o grao, de forma que se imparta tamén en Vigo e A Coruña.
Esta decisión tomouse este xoves tras unha reunión extraordinaria da xunta que se celebrou na propia Facultade de Medicina e que iniciou durante o mediodía e que se estendeu até media tarde.
Así, tras o debate optouse pola votación en urna do acordo con tres opcións posibles: a favor, en contra ou en branco. Deste xeito, o acordo aprobouse con 64 votos a favor, 21 en contra e catro en branco.
Este acordo produciuse de face á sesión extraordinaria do Consello de Goberno da USC, convocada para este venres cun único punto na súa orde do día: a aprobación, se procede, do convenio entre as Consellerías de Sanidade e Educación coas tres universidades para a descentralización do grao.
Cabe lembrar que o calendario aprobado polo Consello de Docencia Clínica establece a descentralización progresiva da docencia, tanto teórica como práctica, de 4º, 5º e 6º curso do grao de Medicina, que se aplicará de forma progresiva durante tres cursos.
Cando finalice a aplicación do acordo, no curso 2028/29, o tres últimos cursos do grao en Medicina impartiranse ao completo nas cidades de Santiago, Vigo e A Coruña. Durante este tempo, as outras dúas universidades comprométense a aprazar a petición formal dunha titulación propia.
Escribe o teu comentario