Muros, Castro de Ribeiras de Lea e Cospeito, "abandonados" pola falta de atención pediátrica

A alcaldesa de Muros, María Lago, solicitoulle unha reunión "urxente" ao conselleiro de Sanidade, Antonio Gómez Caamaño, para abordar a "grave" situación do servizo de Pediatría no municipio.

Nunha carta enviada ao responsable autonómico, a alcaldesa móstralle a súa preocupación e expón que levan máis dun ano e medio cunha baixa de longa duración do pediatra que traballaba só en Muros.
 

"A outra pediatra, que debe dar servizo algunhas horas cada semana no centro de saúde de Carnota, atópase de baixa desde hai varios meses e o seu substituto non exerce todos os días en Muros", detalla.

Apunta ademais que esta situación afecto a 900 nenos de Muros e Carnota, "que en moitas ocasións son atendidos por outro profesional e, no caso dos nenos de 0 a 3 anos, son derivados a Outes ou Noia os días nos que non hai pediatra".
 

Por último, defende que os concellos pequenos e medianos teñen "os mesmos dereitos", polo que necesitan, de igual maneira, uns servizos públicos "dignos e de calidade".

PROBLEMAS EN CASTRO DE RIBEIRAS DE LEA E COSPEITO

Nunha situación similar atópanse os veciños de Castro de Ribeiras de Lea e Cospeito (Lugo), que denunciaron a situación "alarmante e insosteible" que enfrontan as localidades no que respecta á atención pediátrica.
 

Nun comunicado explican que, nos últimos días, no centro de saúde de Cospeito finalizou o contrato da enfermeira pediátrica con especialización e anunciouse a praza para a súa substitución.

"Esta decisión deixa aos nenos sen unha referencia profesional especializada e traslada ao persoal de enfermaría tarefas que requiren unha formación específica que o sistema non garante", lamentan.

Ademais, apuntan que Castro de Ribeiras de Lea leva "anos" sen contar con enfermeira pediática especializada, "unha ausencia reiteradamente sinalada pola propia pediatra debido á complexidade asistencial da zona: un número moi elevado de nenos, familias con orixes diversas e múltiples casuísticas que necesitan un seguimento profesional especializado para garantir unha atención segura, áxil e acorde ás necesidades reais do territorio".

A facultativa atende actualmente aos concellos de Castro de Rei, Cospeito e Outeiro de Rei. Tras a perda da enfermeira especializada de Cospeito, "só un destes tres concellos contará con este perfil profesional, evidenciando un desequilibrio evidente entre os servizos que reciben as áreas urbanas e a realidade das zonas rurais".
 

A isto engaden que a pediatra advertiu que solicitará un traslado se non se restablecen as condicións mínimas de calidade asistencial, "o que deixaría aos nenos da comarca nunha situación de desamparo sanitario absoluto".