A Xunta di que "a solución" para o incendio do vertedoiro da Rúa "esta en mans do concello"

O presidente da Xunta, Alfonso Rueda, pediu á alcaldesa da Rúa (Ourense), María González Albert, que "se implique" co vertedoiro municipal, que continúa ardendo tras ser afectado polo incendio de Larouco. En palabras do mandatario autonómico, "a solución está en mans do concello".
 

Preguntado polos medios de comunicación na comparecencia posterior ao Consello extraordinario da Xunta, celebrado este venres en Ourense, Rueda sinalou que o vertedoiro conta con sancións por parte da Administración autonómica.

"Dicir que un vertedoiro municipal non regularizado é un problema da Xunta, cando non ten nada que ver co concello titular, é complicado de entender", sinalou.

Nesta liña, explicou que a Deputación de Ourense está en contacto coa alcaldesa da Rúa para ofrecer axuda "no que necesite" facer no vertedoiro. No entanto, o que lle transmitiu o presidente da Deputación, Luís Menor, é que está "á espera" de que o concello lle diga exactamente o que necesita.
 

"A Deputación está disposta a axudar", salientou Rueda, á vez que lle pediu a González Albert que "se implique" tamén. "Creo que demos todo un exemplo durante estes días de que o menos importante eran os custos económicos. Por tanto, que cada un faga o que teña que facer", apuntou o presidente do Goberno galego.
 

Con todo, finalizou asegurando que "a solución do vertedoiro da Rúa está en mans do concello", e reiterando que "desentenderse e dicir que o arranxe a Xunta non é a solución".