As ambulancias de Santiago son un risco para os pacientes, alertan traballadores e rebate o SERGAS
O de Santiago é o primeiro conflito importante que salta á opinión pública desde que a Xunta mellorou as condicións das adxudicacións das ambulancias o que, en teoría, debería ter como consecuencia mellores condicións laborais para os técnicos.
Atrasos, esgotamento e escaseza de medios. Esta é a situación que, segundo denuncia o sindicato CIG, atravesan os profesionais do transporte sanitario non urxente na área sanitaria de Santiago-Barbanza. A central sindical asegura que este servizo esencial sofre unha crecente degradación debido á falta de persoal, de vehículos e de material, mentres a carga de traballo non deixa de aumentar.
A CIG, que ostenta a representación no comité de empresa, acusa ao Servizo Galego de Saúde (#SERGAS) de inacción e de ignorar reiteradas advertencias sobre a deterioración do servizo, que, afirman, pon en risco tanto a usuarios como a traballadores. A concesión está xestionada por unha UTE formada por Servizos Sanitarios do Cantábrico SL e Ambulancias Casabranca SL, que xa estivo no centro dun conflito laboral hai un ano.
O sindicato denuncia que operan desde hai tempo cun número insuficiente de ambulancias e equipamento, o que xera demoras inxustificables nos traslados. Ademais, alertan de que o persoal soporta un exceso de carga física por ter que realizar os servizos en solitario, o que se traduce en lesións graves e casos de incapacidade permanente entre traballadores novos.
Choque entre traballadores e administración
Desde a CIG insisten en que a situación se agrava pola falta de reforzos humanos ante o aumento constante de servizos. Afirman que o persoal está desbordada e que os profesionais deben afrontar sós traslados de pacientes dados de alta, algo que consideran un risco para todas as partes implicadas.
O comité asegura que mantiveron varias reunións co Sergas sen que até agora se traducisen en melloras. Ante o que consideran unha actitude de desinterese institucional, preparan mobilizacións para esixir un reforzo inmediato de recursos, a equiparación co transporte urxente e a mellora das condicións laborais.
A Xunta pide calma e que as ambulancias operan con garantías suficientes
Pola súa banda, a xerencia da área sanitaria de Santiago nega que o servizo estea en perigo e lanza unha mensaxe de tranquilidade aos usuarios. Aseguran que a calidade e a continuidade están plenamente garantidas.
Desde a administración sanitaria lembran que o actual contrato entrou en vigor en outubro pasado tras un proceso de licitación pública, e que trouxo consigo melloras económicas e laborais recollidas no último convenio galego do sector.
A xerencia destaca que este novo acordo supuxo un incremento do 33% no custo anual do servizo, cun aumento de 1,5 millóns de euros, o que permitiu subir o número de ambulancias operativas e actualizar as condicións laborais do persoal.
A pesar da tensión entre ambas as partes, desde o Sergas insístese en que a prestación sanitaria está garantida e que as melloras introducidas contribuirán a resolver os problemas existentes. O conflito, con todo, segue latente e ameaza con escalar se non se alcanza un entendemento. Conflitividade que, por outra banda, foi unha constante no sector das ambulancias en Galicia -que está privatizado- nos últimos lustros.
Escribe o teu comentario