A Xunta desatende a varios alcaldes e nin suspende as clases nin sobe o nivel de emerxencia

O Goberno galego mantén o nivel 1 do Plan Territorial de Emerxencias e asegura que os equipos autonómicos están preparados para actuar de inmediato ante calquera empeoramento.

A Xunta defendeu este luns que “non concorren por agora circunstancias” que xustifiquen activar o nivel 2 de emerxencia do Plan Territorial de Emerxencias de Galicia (Platerga), a pesar de que algúns concellos como Vilaboa e Cuntis solicitaron intensificar o dispositivo ante os efectos da borrasca Joseph, que deixou cortes de luz, árbores caídas e estradas alagadas en distintos puntos de Pontevedra. O Executivo autonómico insiste en que os seus medios permanecen en alerta operativa e listos para mobilizar se fose necesario.

Galicia en alerta amarela por vento

Segundo informou a Consellería de Presidencia, continúa activado o Plan especial de Protección Civil ante o risco de inundacións (Inungal), que opera como protocolo específico para a xestión de incidencias derivadas do temporal. O departamento subliña que calquera cambio “significativo” na situación meteorolóxica será “avaliado de inmediato para adoptar as medidas oportunas conforme á normativa vixente”.

O martes 27 de xaneiro Galicia seguirá baixo aviso amarelo por vento, con refachos de até 80 km/h no litoral atlántico e choivas persistentes no sur e o interior da comunidade. Segundo Meteogalicia e AEMET, a borrasca Joseph —catalogada xa como de alto impacto— continuará afectando á fachada occidental durante a mañá, aínda que tenderá a desprazar ao Cantábrico pola tarde.

Volta progresiva á normalidade nos centros escolares

Tras a suspensión das clases e do transporte escolar en zonas do interior de Pontevedra este luns, a Xunta prevé recuperar a normalidade académica o martes, coincidindo coa mellora do tempo prevista a partir do mediodía. O Goberno autonómico explica que a cancelación da actividade lectiva “é unha medida excepcional” contemplada no Plan de actuación ante situacións meteorolóxicas adversas no ámbito educativo, e decídese de forma coordinado a través da Comisión de Alertas Escolares.  Desatende así as peticións dalgúns alcaldes, como o de Vilaboa. 

A Xunta estima que o aviso por vento remitirá antes do inicio do horario escolar e non existen alertas meteorolóxicas adicionais que impliquen risco grave ou xeneralizado para a poboación nin para o funcionamento dos colexios. En calquera caso, as autoridades recomendan extremar a precaución por posibles caídas de ramas ou acumulacións de auga en vías secundarias.