Aprazada a folga indefinida de autobuses na Coruña
O inicio da folga indefinida de autobuses na provincia da Coruña aprazouse até o martes tras a reunión entre sindicatos (#CIG, UXT e CCOO) e patronal. Este luns, 2 de febreiro, seguirán as negociacións entre ambas as partes.
O responsable de transportes da Confederación Intersindical Galega (#CIG), Ernesto López, consultado por Europa Press, manifestou que a reunión deste sábado foi "tremendamente decepcionante" e están "lonxe" de chegar a un acordo.
"Eles -- a patronal -- entenden que están preto de chegar a un acordo, nós non, pero imos darlle unha oportunidade e seguir negociando", explicou.
Segundo detallou López, a patronal ofreceu unha rebaixa da xornada laboral, pero "se nega a entrar" en aspectos "importantes" como o salario, a xubilación parcial ou a mellora do complemento de nocturnidade. Así, insistiu en que a subida salarial é "en grao sumo importante".
No entanto, "van darlle a oportunidade" de seguir negociando este luns, xa que "parece que poden traer algo máis". "Se o luns se chega a un acordo hai desconvocatoria da folga, senón convocarase para o martes, 3 de febreiro", asegurou.
"Necesitamos unha rebaixa da xornada moitísimo maior que a que está encima da mesa. Que se entre na xubilación parcial e unha subida salarial máis importante, entre outros aspectos", concluíu.
Escribe o teu comentario