HM Hospitais e Adeslas negocian para que A Rosaleda siga atendendo a Muface

Portavoces da empresa hospitalaria explican que efectivamente o hospital xa non está no cadro médico de Adeslas, como tamén se pode comprobar na web da aseguradora. Con todo, insisten en que se está tentado chegar a un acordo polo ben dos mutualistas.

De non alcanzalo, os asegurados de Muface en Santiago terían que recorrer a hospitais do grupo Quirónsalud na Coruña e Pontevedra, que están a máis de media hora de distancia en coche.

A CIG cargou contra o recorte. Para o sindicato nacionalista, estamos ante unha proba da suposta cobiza das aseguradoras médicas, pois Adeslas, di, introduciu ese cambio despois de lograr que Muface aumentase o concerto para os próximos anos, tras ameazar as aseguradoras con deixar sen cobertura aos funcionarios.

A novidade prodúcese xusto cando está aberto o prazo para cambiar de aseguradora. De feito, hai miles de persoas con pólizas de DKV -aseguradora que non se presentou ao novo convenio con Muface- que teñen até final de mes para escoller entre Adeslas, Asisa ou a sanidade pública, o SERGAS.

Por agora, o cadro médico de Asisa para 2025 na provincia da Coruña inclúe o HM A Rosaleda. Con todo, se isto cambia, os asegurados de Muface en Santiago de Compostela quedarían sen ningún hospital para urxencias sanitarias.

Para CIG, a inestabilidade e os recortes das aseguradoras son mostra de que o modelo de aseguradoras privadas debe deixar atrás e que todos os traballadores públicos deben ser atendidos polo SERGAS. Con todo, hai que ter en conta a difícil situación dalgúns servizos da sanidade pública. Neste caso, en particular, as longas esperas e os atascos periódicos que sofren as urxencias do CHUS de Santiago, o hospital do SERGAS na capital de Galicia.