Seis plataformas de pediatría e enfermaría únense para demandar a atención sanitaria a todos os nenos

A falta de pediatras na Atención Primaria é un dos principais problemas da sanidade pública a nivel nacional. En Galicia sófreno especialmente moitas contornas rurais onde as funcións do pediatra en centros de saúde son suplidas por puericultores no mellor dos casos, obrigando noutros ás familias a desprazar decenas de quilómetros para poder recibir atención pediátrica. Por isto, até seis plataformas uníronse para demandar que se garanta en toda España que o 100% da infancia "sexa atendida nos centros de Atención Primaria por pediatras e enfermeiras pediátricas". 

"RESPECTO" Ao "DEREITO DOS NENOS"

Trátase dunha iniciativa que integran a Asociación Española de Pediatría (AEP), a Asociación Española de Atención Primaria (AEPap), a Sociedade Española de Pediatría Extrahospitalaria e Atención Primaria (SEPEAP), a Asociación Española de Enfermaría Pediátrica (AEEP), a Federación Española de Asociacións de Enfermaría Pediátrica (FEDAEP) e a Sociedade Española de Enfermaría Neonatal (SEEN).

Estas organizacións reiteran que os pediatras e enfermeiras pediátricas son os únicos profesionais sanitarios "especificamente formados para tratar a saúde infantil". Os colectivos, compostos por preto de 26.500 profesionais, reiteran que a demanda está pensada para todas as comunidades autónomas de España, á vista dos alarmantes datos que ofrece o sector, cunha caída en picado nos últimos anos do número de postos de pediatría cubertos na Atención Primaria.

As organizacións redactaron un manifesto para reclamar "que se respecte o dereito de todos os nenos, nenas e adolescentes a recibir a mellor atención sanitaria dispoñible, proporcionada polos profesionais de confianza das familias". A continuación, instan as autoridades sanitarias competentes "a que garantan o acceso equitativo e universal á atención pediátrica nos centros de saúde". A lectura e presentación do manifesto será o próximo 6 de maio en Madrid, na Academia AEP ás 10:30 horas.