A Xunta non publicará "a totalidade" de esperas sanitarias e di estar "mellor que outros territorios

O PPdeG rexeitou este martes unha moción defendida polo BNG no pleno do Parlamento galego que pedía de forma expresa "facer pública a totalidade das listas de espera do sistema público de saúde, incluíndo as non estruturais, nun prazo non inferior a un mes" e habilitar "os mecanismos precisos" para acabar con este formato de espera.

A votación da moción, que tivo o apoio de PSdeG e Democracia Ourensá (D.Ou.), saldouse co rexeitamento dos populares. Antecedéralle un debate tenso, co transfondo da manifestación do pasado domingo en Santiago, no que as deputadas nacionalista Iria Carreira e socialista Elena Espinosa afearon a situación da sanidade pública galega á Xunta 
 

En fronte situouse a deputada popular Encarna Amigo, quen reivindicou a transparencia e a xestión sanitaria do Goberno que dirixe Alfonso Rueda. Esgrimiu que os datos que fai públicos o Servizo Galego de Saúde (#Sergas) son públicos e replicados polo Ministerio.

"E se os comparamos cando vostedes gobernaban, en calquera magnitude que usemos, sexa cal for, deixa a xestión do bipartito en moi mal lugar", aseverou, antes de proclamar que "a gran mentira da esquerda é esquecer que Galicia é referente na sanidade pública universal e de calidade".
 

"Non imos negar que temos problemas, pero estamos en mellor situación que outros territorios, mesmo naqueles nos que gobernan socialistas e nacionalistas", agregou, antes de atacar aos seus rivais: "Miren, señores da oposición, vostedes pretenden gañar na rúa o que perderon nas urnas. Buscan esconder os seus bulos entre berros e pancartas, pero non o van a conseguir".

Na súa segunda quenda, contraatacou Carreira, quen mostrou un cartel dunha protesta sanitaria en Carnota (A Coruña) por falta de atención pediátrica co logotipo do PP, entre outras formacións e asociacións que a secundan. "Os seus propios colegas do partido están a dicir que a súa xestión é nefasta", remarcou a nacionalista.
 

Varios deputados do PP replicaron desde os seus escanos axitando uns cartóns tamaño folio co logotipo do BNG nos que se podía ler a lema 'Non' --o número dous da formación, tamén deputada, Paula Prado, rebautizó hai poucos días á líder da formación nacionalista como 'Ana Nonnón'-- e xerouse un certo barullo que acabou cunha intervención do xefe do Lexislativo, Miguel Santalices, cunha petición: "que non se fagan fotos, que despois as carga o diaño".

Os nacionalistas quedáronse coa mensaxe do "non" que lles achacan os populares, que viviron o 'efecto bumerán' á hora de votar, con exclamacións de "non" desde as bancadas nacionalistas ante cada unha das tres mocións que rexeitaron coa súa maioría absoluta nesta sesión.

E é que, a mesma sorte que a moción do Bloque sobre as listas de espera sanitaria, corrérona a da mesma formación que pedía unha rede de servizos residenciais específicos para persoas con problemas de saúde mental, e a formulada polo PSdeG respecto ao desenvolvemento dun plan estratéxico de servizos sociais. Non saíron adiante polo voto en contra do PP, aínda que foron apoiadas polo resto de grupos.