Rueda descarga nos técnicos a seguridade no Materno Infantil de Ourense: "Se continúa a actividade hospitalaria é porque se pode"

En decembro de 2023 o teito do Paritorio do Hospital Materno Infantil de Ourense viña abaixo para estupefacción dos sanitarios que desenvolven o seu labor nestas instalacións. Case un ano e medio despois, a escena volve repetirse neste centro ourensán, onde o Sindicato Médico de Galicia (SIMEGA) fíxose eco da situación das instalacións onde se rexistrou outro desprendemento no falso teito da terceira planta, sen que haxa que lamentar nesta ocasión danos persoais.

UN RISCO PARA TODOS

Non é a primeira vez que sucede algo así, aínda que no pasado a caída de cascotes nunha consulta deixou ferida a unha pediatra. Nese sentido, o sindicato emitiu un comunicado para reclamar unha "revisión urxente" nestas instalacións ao considerar que hai "un risco real" que axexa tanto a sanitarios como a pacientes.

"A falta de mantemento do edificio desde fai máis dunha década non fixo máis que acrecentar a deterioración das instalacións", lamentan desde o sindicato, onde lembran que fai xa máis de dez anos que se anunciou que se acometería a derriba do Materno para "a construción dun novo centro". Desde entón, os labores de mantemento foron mínimas, mentres se sucedían os accidentes. 

O sindicato pregunta si "ten que haber feridos graves para que se adopten medidas" mentres o estado do centro é "lamentable". Neste contexto, o sindicato denuncia que hoxe non hai espazo suficiente para garantir a seguridade mínima nas actividades diarias do centro, onde se decretaron traslados de servizos, consultas e peches de plantas. A sospeita, indican, é que poden trasladar a este centro as consultas do Novoa Santos, pendente de reforma e no medio dun polémico proceso de traslados denunciado polos propios sanitarios e pacientes.

"SOMOS CONSCIENTES"

Cuestionado por estas acusacións, o presidente da Xunta de Galicia, Alfonso Rueda, respondeu as preguntas de Galiciapress sobre si o Goberno de Galicia, ante este escenario pode asegurar a seguridade das mulleres que van dar a luz nesas instalacións, así como a doutros usuarios e traballadores do centro. 

"A constatación de que somos conscientes de que é necesario facer obras de mellora de todo tipo en hospitais é que xa as estamos facendo", subliñou o mandatario en primeiro momento, que puxo o acento nos "importantes investimentos económicos" que vén facendo o seu goberno "empezando polo Hospital de Ourense". 

"Afortunadamente ese derrube non significou ningún dano persoal", puntualizou Rueda, á vez que descargou as responsabilidades de dar garantías de seguridade sobre "os técnicos que examinaron o derrube e examinarán calquera incidencia".

"Se eles garanten que pode continuar a actividade hospitalaria é porque se pode facer. Estou absolutamente seguro e non me cabe a mínima dúbida de que non autorizarían nada de non ser así", estima o presidente, que abriu a porta a adoptar outras medidas a maiores se fosen necesarias.