Suspenden preventivamente a autorización das minas de San Finx para verter a un río augas residuais

O Tribunal Superior de Xustiza de Galicia (#TSXG) acordou a suspensión cautelar da autorización de verter ao río Pesqueira ou Rego de Rabaceiros augas residuais procedentes das minas de San Fins (Vilacoba), ditada por Augas de Galicia en febreiro de 2023.
 

A sección terceira da sala do contencioso-administrativo estima así a apelación interposta pola confederación Ecoloxistas en Acción contra a resolución de 30 de novembro de 2023 do xulgado do contencioso-administrativo número 2 de Santiago, que denegou a solicitude de suspensión cautelar das verteduras procedentes da mina de estaño e wolframio.

Na resolución, con data do pasado 28 de febreiro, consta que as verteduras afectan á Rede Natura 2000, sen que a administración ou a mineira valoren esa afección. Segundo a sentenza, "o principio de precaución que inspira o dereito medioambiental leva que, ante tal incerteza, deba adoptar a protección do medioambiente respecto de zonas da Rede Natura 2000".

Nese sentido, destaca que o apartado 6.3 da Directiva 92/43/#CEE do Consello sobre conservación dos hábitats naturais e da fauna e flora silvestres impón, en aplicación do principio de cautela, "que debe quedar demostrada, antes da aprobación dun proxecto, a ausencia de efectos negativos en tales ámbitos, sen poder ser autorizado si existe incerteza, principio de precaución consagrado no artigo 191 do Tratado de Funcionamento da Unión Europea".

SEN DIA

O fallo indica que, neste caso, "non se realizou unha DIA (declaración de impacto ambiental) nin do proxecto de verteduras nin do mineiro, polo que resulta imprescindible a adopción cautelar para evitar danos ambientais irreparables, que debe realizar con carácter previo á aprobación do plan ou programa".

Engade que os efectos da contaminación da ría Noia-Muros sobre a actividade económica da zona son, segundo a resolución, "indubidables, ao resultar notoria a afectación á actividade marisqueira, que constitúe un dos motores económicos da comarca, polo aumento dos metais pesados". A sentenza non é firme e cabe interpor recurso de casación ante o Tribunal Supremo.