O sur de Galicia estivo sen o seu helicóptero de emerxencias do 061 máis de dúas semanas
A aeronave da Fundación 061 estivo en mantemento até onte, confirman a Galiciapress fonte da Xunta, sen que houbese outro helicóptero de substitución, como obriga o concurso. O incumprimento de Eliance en Ourense prodúcese xusto despois de facer o mesmo co helicóptero de Santiago, mandalo a reparar sen enviar substituto como manda a adxudicación. CIG denuncia que a Xunta mira cara a outro lado e que a empresa se aproveita que lle é máis barato pagar a penalización que se lle poña que traer unha substitución.
O helicóptero de emerxencias sanitarias do 061 con base en Ourense estivo fóra de servizo desde o 17 de xaneiro até o 2 de febreiro debido a labores de mantemento en Sabadell. Durante este período, a empresa concesionaria, ELIANCE, non proporcionou unha aeronave de substitución, incumprindo os termos do contrato, segundo denunciou o sindicato CIG.
#CIG-Saúde: Incumprimentos reiterados
Charo Rúa, delegada da CIG no servizo, sinalou que os pregos de contratación establecen que, en caso de revisións rutineiras, a empresa debe suplir o servizo cun helicóptero de reposto desde o primeiro momento.
Con todo, afirmou que os incumprimentos por parte de ELIANCE son habituais C.omo exemplo, mencionou que recentemente a base de Santiago estivo sen cobertura durante oito días debido a unha revisión similar.
"Se o servizo fose o mesmo por terra, non serían necesarios os helicópteros sanitarios"
A representante sindical cualificou de "patético" que a dirección do 061 sosteña que, durante estes períodos, a poboación segue estando cuberta mediante o envío dunha ambulancia en caso de emerxencia. "Se o servizo fose o mesmo por terra, non serían necesarios os helicópteros sanitarios", replicou Rúa.
Resposta da Xunta
Pola súa banda, a Xunta indicou esta tarde a Galiciapress que o helicóptero volveu estar operativo o domingo pola tarde. Durante a súa ausencia, a cobertura de emerxencias, di o Goberno, garantiuse cunha ambulancia de soporte vital avanzado (#SVA), medicalizada polo equipo sanitario do 061 correspondente ao helicóptero.
Esta ambulancia permaneceu operativa até a finalización das tarefas de revisión da aeronave para asegurar que continuase cumprindo con todas as condicións de seguridade esixidas, alegan desde o 061. A administración autonómica subliñou que Urxencias Sanitarias de Galicia-061 realiza un seguimento continuo e rigoroso do cumprimento do contrato de transporte sanitario urxente aéreo, aplicando as sancións e medidas correspondentes en caso de incumprimento por parte da empresa adxudicataria, co obxectivo de manter os estándar de calidade na asistencia ás urxencias e emerxencias sanitarias.
Preocupación pola seguridade
#CIG-Saúde expresou a súa preocupación pola falta de rexistro sobre si estas ausencias tiveron consecuencias fatais, xa que non se dispón de datos respecto diso.
Ademais, considerou evidente que a Xunta de Galicia contratou un servizo que a empresa ELIANCE "non está a cumprir, pero que todos os galegos e galegas estamos a pagar". Aínda que a administración afirma que está a impor sancións á empresa, "iso non soluciona o problema de non ter un helicóptero para atender as emerxencias", concluíu o sindicato.
Escribe o teu comentario