21 colexios e institutos danse de baixa do programa de libro electrónico da Xunta, E-dixgal

Un total de 614 centros educativos galegos estarán adheridos a partir de setembro, co inicio do curso 2024/25, ao programa do libro dixital 'E-Dixgal'. Aínda que seguirán sendo máis da metade, serán 16 menos que durante o 2023/24, cando había 630.
 

Nos últimos meses,  a Xunta de Galicia prometeu melloras en E-Dixgal, tras meses de críticas e debates sobre a calidade do material e a limitación do tempo de pantalla para os nenos. En concreto, Educación anunciou un plan para mellorar os contidos, cuxa pobreza leva anos sendo obxecto de crítica por parte de profesores e sindicatos do sector.

Ante o debate social, a Xunta encargou un estudo que revela que non hai diferenzas significativas entre as notas alcanzadas centros que utilizan E-Dixgal e os que non. As únicas diferenzas, mínimas, prodúcense cando os centros levan catro ou máis anos utilizando o programa.

Hai que ter en conta que a Asociación Española de Pediatría recomenda limitar o tempo de pantalla aos nenos.  O consenso actual entre os expertos é que a dependencia das pantallas pode afectar negativamente ás habilidades cognitivas e á capacidade lectora dos nenos.

Ademais, algunhas AMPAS  expresaron inquietudes sobre a seguridade na navegación dos nenos en Internet e a falta de supervisión axeitada. Tamén criticaron á Xunta por non responder ás súas inquietudes e non tomar medidas para abordar os problemas xerados por E-Dixgal. 

Unha das claves do debate foi a pobreza de contidos das leccións virtuais, en comparación con líbroos en papel. A Xunta respondeu con novo contrato de E-Dixgal, que obriga a ofrecer material imprimible. O libro electrónico é un importante negocio para algunha empresa, pois  supón 4 millóns de euros cada curso.

BAIXAS E INCORPORACIÓNS
O Diario Oficial de Galicia (#DOG) publicou este xoves a resolución da Dirección Xeral de Ordenación e Innovación Educativa cos colexios e institutos que contarán con esta iniciativa nalgúns dos cursos entre 5º de Primaria e 4º de ESO, resume Europa Press.

A listaxe confirma un descenso dos centros que operan con 'E-Dixgal' tras meses de polémica a raíz do goteo de colexios que decidiron desanotarse. Por este motivo, representantes da Consellería de Educación realizaron varias roldas de contacto con directores e asociacións de nais e pais.
 

Ademais, prodúcese unha importante baixada nos centros que son de nova incorporación ao libro dixital. Se o ano pasado foron un total de 35 os que empezaron a empregalo ou o ampliaron a máis cursos, o próximo haberá cinco novos.

En concreto, incorpóranse a 'E-Dixgal' a partir de setembro o CEIP Plurilingüe Celso Currás de Trabada (Lugo), o CEIP Vicente Risco de Cualedro (Ourense), o CEIP Plurilingüe Rodolfo Núñez Rodríguez de Vilardevós (Ourense), o CEIP Plurilingüe Ramón e Cajal de Vigo e o CPI Manuel Suárez Marquier do Rosal (Pontevedra).

Cabe lembrar que o próximo curso entrará en vigor o novo contrato do libro dixital que aprobou o luns o Goberno galego, por case 10,3 millóns de euros. O contrato, que contará con algunhas novidades como máis contido impreso, durará dous anos prorrogables por outros dous.