Profesores de toda Galicia participan no primeiro día de protestas como antesala doutra folga de docentes

"A pelota está no tellado da Consellería". Os sindicatos #CIG, STEG e #CSIF teñen claro que, para parar as protestas dos profesores galegos, só hai unha solución posible: o diálogo. Un diálogo que a Consellería de Educación apraza despois de que alcanzase con UXT , CC.OO. e ANPE un pacto tachado pola maioría sindical de" acordo da miseria". A necesidade de revisar ese texto cos sindicatos que representan un 59% dos delegados electos nas pasadas eleccións sectoriais e máis do 60% dos votos depositados nas urnas leva a estes organismos a convocar, unha vez máis, aos docentes a mobilizar, cun primeiro acto celebrado este xoves.

Os centros escolares foron o escenario da protesta nas que participaron "miles" de profesores en centenares de centros, segundo as cifras que achegan militantes de STEG a este diario noutra xornada que cualifican de "masiva", como foi a do 24 de outubro, cando se celebrou unha folga cun seguimento por encima do 70% na educación secundaria. Á vista dos moitos post publicados en redes sociais, os sindicatos refrean o músculo do que presumen na comunidade docente.

"Demostra o cabreo do corpo docente", din estas fontes para Galiciapress, que achegan testemuños procedentes de Mos, Lugo, Oleiros, Becerreá, Vigo, Melide, Cangas ou Rianxo. Profesores nas entradas dos centros con pancartas contra os recortes na educación e proclamas como "por un ensino de calidade, atención real", "o profesorado non se vende" ou "menos cocientes e máis profes".

MÁIS PROTESTAS EN NOVEMBRO

Sen unha negociación entre os actores implicados á vista, o calendario de mobilizacións anunciado a principios de mes segue inalterable. Así as cousas, mantéñense as concentracións programadas nas cidades galegas "en horario de tarde" o martes 14 de novembro e "unha gran manifestación nacional en Santiago de Compostela" para o domingo 19 de novembro, para a que se chama a participar a alumnos, pais e profesores.

Todo isto é a antesala da segunda xornada de folga na educación galega convocada para o martes 28 de novembro, se nada o remedia. Sería o segundo paro en apenas 30 días polo "acordo de renuncias" selado pola Consellería e polo que os sindicatos piden modificacións substanciais, como a recuperación dos horarios lectivos das 18 horas para o profesorado de Secundaria e das 21 para os de Primaria, a redución da carga burocrática e os cocientes das aulas ou a "repartición lineal da masa salarial comprometida pola Consellaría entre todo o profesorado".