Alas A Coruña homenaxeará a Samuel Luiz polo segundo aniversario do seu asasinato

Este luns cumpriranse dous anos da morte de Samuel Luiz, o mozo de 24 anos da Coruña, que foi asasinado na madrugada do 3 de xullo de 2021 nunha malleira no paseo marítimo da cidade herculina, á saída dun local de lecer. Este caso atópase aínda á espera dun xuízo para o que aínda non hai data e nun contexto no que os delitos de odio cara ás persoas LGTB "mantéñense".

Así o apunta a presidenta de Alas A Coruña, a Asociación pola Liberdade Afectiva e Sexual, quen denuncia que "a LGTBIfobia existe" e a este colectivo "ségueselles insultando, ségueselles pegando, ségueselles matando" e, por iso, reclama a "implicación das institucións". "Isto é un tema de 365 días ao ano, hai que implementar políticas públicas que xeren espazos seguros para a nosa comunidade ao longo de todo o ano", demandou.

Un estudo elaborado por Alas constata que no ano 2022 rexistráronse en Galicia 68 incidentes de odio, dos que 58 están considerados como agresións cara a este colectivo. "Unha cifra brutal", criticou García, á vez que asegurou que na cidade da Coruña "moitos fins de semana hai xente denunciando que hai certos locais de lecer nocturno nos que hai problemas para a comunidade LGTBI". En canto ás cifras de 2023, "máis ou menos estamos parellos ao ano pasado", lamentou.

García sinalou que coa morte de Samuel Luiz "de súpeto" a sociedade foi consciente de que "existe o problema da LGTBIfobia". Consecuentemente, engadiu, a cidadanía "pódese levantar —precisou sobre as demandas e mobilizacións—, pero son os seus representantes institucionais os que teñen que recoller o que a sociedade lles pide para mellorar as súas vidas". "As institucións non fan nada nese sentido", reprochou.
 

HOMENAXE A SAMUEL LUIZ

Con motivo do segundo aniversario do falecemento de Samuel Luiz, as colectivo Alas, entidade que exerce de acusación popular no caso, realizará o vindeiro luns ás 20:00, unha "vixilia homenaxe" no lugar onde se produciron os feitos cunha ofrenda floral, un minuto de silencio e "algunha peza musical". "É un día para celebrar a memoria e vida de Samuel Luiz e para reivindicar que se faga xustiza nas rúas e no xulgado", recalcou.

Mentres tanto, o caso continúa á espera de xuízo con cinco persoas acusadas polos feitos, catro homes e unha muller, esta última era nova dun deles cando se produciu o suceso. Tres están en prisión preventiva, unha medida que se prorrogou ao cumprir os dous anos, e outros dous, un home e unha muller, en liberdade con obrigación de comparecencias no xulgado.

Tanto Fiscalía como acusacións consideran os feitos como constitutivos dun delito de asasinato. A un deles, por quedar presuntamente co móbil de Samuel, o Ministerio Público atribúelle tamén un delito de roubo con violencia.