HM Hospitais conmemora o Día Internacional de Enfermaría na praza Roxa de Santiago
Fíxoo a través dunha 'Caseta da Saúde' no que se realizaron probas e proporcionouse información a todas as persoas que se achegaron
Con motivo do Día Internacional da Enfermaría, celebrado cada 12 de maio, HM Hospitais organizou un evento en Santiago, instalando unha 'Caseta da Saúde' na céntrica praza Roxa da cidade, onde se relizaron diversas probas de forma grauita a quen se achegaron.
Esta iniciativa ten como obxectivo "visibilizar e pór en valor o gran traballo que realiza o persoal da enfermaría, que son sen ningunha dúbida un dos motores da sanidade". Así o explicou a doutora Verónica Ángel, directora médica de HM Hospitais en Santiago.
Na caseta tomáronse constantes, pulso e glucemia, ademais de ofrecer información e asesoramento sobre hábitos saudables. A directora de Enfermaría de HM Hospitais en Santiago , Gloria García Barreiro, sinalou a importancia de "manter uns hábitos saudables, así como realizar revisións periódicas que poidan contribuír a reducir notablemente a gravidade de moitas enfermidades".
Ao longo da xornada deste venres realizáronse máis dun centenar de probas, aínda que foron moitísimas máis as persoas que se achegaron a esta 'Caseta da Saúde' de HM Hospitais para buscar información, un éxito que o grupo espera poder repetir en próximas xornadas.
Escribe o teu comentario