Monbus decreta "servizos mínimos en todas as liñas" ante a folga e os sindicatos din que "non son mínimos"

Persoal do sector do transporte de toda Galicia celebrará este venres 31 de marzo unha folga que promete ser multitudinaria. A revisión das súas retribucións, o desbloqueo das negociacións polos convenios provinciais ou a renovación da flota de autobuses son algunhas das demandas dos profesionais, en pé de guerra contra a patronal, dominada nestes momentos polas grandes compañías que até agora mostraron unha postura inmovilista no proceso de diálogo cos sindicatos.

De feito, os propios sindicatos acusaron de "pirataría" á patronal ante a chamada á folga duns 5.000 traballadores en toda a comunidade. Nese sentido, tamén acusan á Xunta de Galicia de ser responsable desta situación ao conceder contratos a empresas para logo mostrar un absoluto "deixamento no control dun servizo tan importante". "Pasan olímpicamente", reprochou Xesús Pastoriza, representante da CIG.

A empresa no ollo do furacán nestes momentos é Monbus, salpicada polo escándalo da sanción do TSXG contra a firma e Alsa ao considerar probada a existencia de" indicios de poder haber repartido o mercado". A sentenza pon nunha posición moi delicada tanto a Monbus, como ao Executivo de Alfonso Rueda -e aos anteriores gobernos, xa que Feijóo recibiu agasallos, como caixas de viño, do dono de Monbus- como a Competencia, que arquivou en 2021 as denuncias presentadas ao concorrer as dúas empresas nunha UTE ao concurso público de varios contratos da Xunta.

"SERVIZOS MÍNIMOS" NON TAN MÍNIMOS

Neste escenario, fronte ao paro do 31 de marzo, Monbus emitiu un comunicado no que informa que este venres "se establecerán servizos mínimos en todas as liñas", cunha listaxe que será actualizado mañá, un día antes da folga. Os sindicatos, por contra, refiren que os servizos mínimos, tal e como están expostos no borrador, "non son mínimos". 

Así, subliñan que fixaron estes servizos nun 80% de media ao estar até as 9:00 horas e a partir das 18:00 horas co 100% e ao mediodía co 53%. Con todo, espérase que a folga deixe en terra a miles de viaxeiros en toda a comunidade, especialmente nun venres, xusto antes das vacacións de Semana Santa, data na que moitos estudantes regresan aos seus pobos para gozar o fin de semana.