Está Galicia tocando o fondo da pandemia? Grandes datos coa Covid "normalizada"

Apenas quedan un puñado de restricións propias da crise sanitaria. Uso de máscara obrigatorio en centros de saúde, hospitais, transporte público, farmacias... Algunhas mesmo poderían ter os días contados. E é que os magníficos datos de Galicia permiten ver que o coronavirus está a se converter nunha patoloxía que xa temos integrada por completo na nosa sociedade.

Sempre alerta por si unha nova variante fai cambiar esta tendencia, a realidade hoxe é que as cifras que notifica o SERGAS permiten anticipar o fondo desta crise sanitaria. Hai 786 casos activos, un centenar menos que onte, e hai 18 camas ocupadas menos, o que significa que hai 129 pacientes de Covid en prata e unha decena de ingresados en UCI. 

Iso si: nunca nos libraremos da Covid-19 e seguirá deixando vítimas. Nas últimas horas Sanidade incorporou seis decesos máis, até un total, segundo as contas da Xunta, de 4.055 mortes desde o estalido da pandemia. 

O Servizo Galego de Saúde (#Sergas) notificou seis falecidos máis por coronavirus en Galicia nos últimos catro días, entre o 20 de xaneiro e o 23. Con estes decesos, a Comunidade galega alcanza as 4.055 mortes vinculadas á pandemia do SARS-Cov-2. Mentres, o número de positivos rexistrado descendeu outro centenar de enfermos.

Segundo a información facilitada pola Consellería de Sanidade, o día 20 de xaneiro notificouse a morte dun home de 77 anos, na área sanitaria de Pontevedra e O Salnés.

Mentres, o 21 de xaneiro, faleceu unha muller de 99 anos, na área sanitaria da Coruña e Cee. O 22 de xaneiro, morreu unha muller de 86 anos, na área sanitaria de Ourense, Verín e Ou Barco; e un home de 89 anos, na área sanitaria de Ferrol.

Finalmente, o Sergas notificou --con datos actualizados até as 18,00 horas deste luns-- o falecemento dun home de 92 anos na área sanitaria de Vigo e o doutro, de 54 anos, na área sanitaria da Coruña e Cee. Todos os pacientes, segundo a Consellería de Sanidade, tiñan patoloxías previas.

BAIXAN CASOS ACTIVOS

Mentres tanto, a Dirección Xeral de Saúde Pública da Consellería de Sanidade informou de que o número de casos activos é de 786, un centenar menos dos rexistrados oficialmente na actualización realizada este luns. Nas últimas 24 horas, abríronse 48 casos novos.

Deles, 152 pertencen á área da Coruña (-43); 107, á de Lugo (-11); 86 (-7), á de Ourense; 82 (-4), á de Pontevedra; 147, á área de Vigo (-10); 139 (-7), á área de Santiago; e 72 (-18), á área de Ferrol.

Do total, dez están en UCI, un máis que na xornada deste luns, e 129 en unidades de hospitalización a domicilio, é dicir, 38 menos que na xornada anterior.