Segundo accidente mortal no que vai de ano na refinaría da Coruña

Onte, sábado, pola mañá, ao redor das 10:50 horas, falecía un traballador da empresa Terraset nas instalacións da refinaría Repsol na Coruña, que contratara os seus servizos para a construción dun muro de formigón.

O falecemento produciuse, segundo apuntan as hipóteses, cando unha das mangueiras que se utilizan para inxectar o formigón, presionada por auga, saíuse do seu sitio golpeándolle fortemente na cabeza.

E non se trata, pois, do primeiro falecido nesta planta. Leste mesmo ano, en marzo, falecía Unai Martínez, vítima de inhalación de ácido sulfhídrico. Este falecemento supuxo numerosas mobilizacións por parte dos sindicatos, familiares e achegados da vítima. O informe da comisión de investigación sinalaba que só se lle permitía a tarefa de engrasado de pernos, pero non de apertura de tapas, que foi o que produciu o escape do ácido que lle causou a súa morte e a hospitalización dun compañeiro, que agora mesmo está de novo de alta.

Con todo, Repsol declarou que este accidente mortal non garda relación coa actividade da propia refinaría, xa que se trata dunha obra civil dunha empresa externa (Terraset, á súa vez contratada por Cicron Construcións).

Fontes sindicais sinalaron que, de momento, aínda non se convocaron mobilizacións para o accidente de onte, xa que considera que non son casos comparables, polo menos mentres non se realice a correspondente investigación. Pola súa banda, o grupo sindical de CC.OO. de Repsol pediu que leve a cabo unha investigación das causas para que os feitos non se repitan.

Por outra banda, entre os usuarios das redes sociais mostrouse preocupación polos feitos, recalcando que xa é a segunda vez no último ano que teñen lugar. As críticas arremeteron contra figuras como Yolanda Díaz, vicepresidenta segunda do Goberno e Ministra de Traballo e Economía Social, en resposta ás súas condolencias expresadas na súa conta de Twitter.

Ademais de Yolanda Díaz e os sindicatos de Repsol tamén mostraron as súas condolencias os distintos grupos políticos locais, así como a alcaldesa da Coruña, Inés Rey.