Rueda achaca a dimisión do xefe de Interna do CHUS a "medidas" que ten que asumir o Goberno central coa sanidade

O presidente da Xunta, Alfonso Rueda, puntualiza que respecta "calquera manifestación de descontento", preguntado pola dimisión de Antonio Pouse. 
 

Con todo, ao redor dos problemas da sanidade pública, insiste en que a Xunta fai todo o que está "na súa man" para mellorar a sanidade e urxe medidas ao Goberno.

Tras coñecerse a dimisión do xefe de Medicina Interna da área sanitaria de Santiago e Barbanza, Antonio Pouse, pola falta de persoal no servizo, o presidente da Xunta, Alfonso Rueda, asegurou que respecta "calquera manifestación de descontento" que poida haber na sanidade.

"Respecto calquera manifestación de descontento que poida haber e, ao mesmo tempo, agradezo tamén que cando as cousas fanse ben se recoñezan, como se facía onte co acordo coas forzas sindicais", manifestou.

ACORDO SINDICATOS

Na rolda de prensa posterior á reunión do Consello e preguntado pola dimisión do xefe de servizo de Medicina Interna do CHUS e os problemas na sanidade, Rueda insistiu en que a Xunta "está a facer todo o que está na súa man" para poñer solucións.

"Onte mesmo chegouse a un acordo con todos os representantes sindicais para establecer unha cantidade maior para remunerar o maior esforzo que teñen que facer os profesionais mentres a creación de novas prazas siga bloqueada ou non siga coa intensidade que se necesita", sostivo.

"HAI QUE TOMAR MEDIDAS"

Tras iso, considerou necesario que, do mesmo xeito que a Xunta toma medidas, as que dependen do Goberno central "sexan tomadas canto antes". "É fundamental, mentres non se tomen, será moi difícil solucionar determinados temas", dixo.

Ademais, afirmou que os problemas que se rexistran, tanto na sanidade galega como no resto de España, non son "novos" nin "só ocorren agora". "Son problemas que había antes e que hai agora", apuntou.

Rueda subliñou que o seu Executivo fala "con todos os sectors que queren falar" para buscar solucións, en "diálogo continuo". "Temos claras algunhas das solucions, aquelas que dependen de nós tomámolas e, as que non dependen, demandámolas", apuntou.