Dous homes, de 38 e 39 anos, feridos graves en Salvaterra nunha saída de vía con envorco do vehículo

Dúas persoas, condutor e acompañante dianteiro, resultaron feridas graves nun accidente de tráfico ocorrido a noite do domingo na autovía #AG-51, no municipio de Salvaterra de Miño (Pontevedra).

Segundo informaron fontes da Subdelegación do Goberno e do CIAE 112 Galicia, o sinistro produciuse pasadas as 23,00 horas á altura do punto quilométrico 0 deste viario, que conecta a autovía A-52 coa Plataforma Loxística Industrial de Salvaterra-As Neves (Plisán).

O turismo avanzou recto por unha rotonda e acabou saír da vía pola marxe dereita, envorcando nun aparcadoiro dunha estación de servizo. Como consecuencia do accidente, resultaron feridos o condutor e o seu acompañante, aínda que non foi necesaria a súa excarceración.

O CIAE 112 informou do sucedido ao GES-Bombeiros de Ponteareas, á Garda Civil de Tráfico e a Urxencias Sanitarias-061. Os feridos, que levaban posto o cinto de seguridade, foron evacuados a un centro hospitalario e a Garda Civil solicitou extracción de sangue para verificar o grao de alcoholemia.

O 061 confirmou que enviou dúas ambulancias ao lugar do sinistro. Unha ambulancia de soporte vital avanzado trasladou a un home de 39 anos de idade, F.L.C, e unha ambulancia de soporte vital básico trasladou a outro home, de 38 anos, V.M.M. Ambos foron evacuados ao hospital Álvaro Cunqueiro de Vigo.