(VÍDEO) Varios axentes da Policía Nacional feridos en Pontevedra ao intervir nunha liorta en plena rúa

Unha intervención da Policía Nacional en Pontevedra na madrugada do sábado ao domingo saldouse con detencións e varios partes de lesións a axentes da autoridade que participaron neste episodio que comezou canto trataban de deter a un individuo na Rúa Loureiro Crespo e todo derivou nunha gran liorta con varios implicados.

TRES DETIDOS

O ocorrido, captado por veciños da zona, foi denunciado polo Sindicato Unificado de Policía (#SUP) de Galicia, onde apoian "sen fisuras" a intervención dos "zetas", que é como se denomina a estas patrullas de axentes da Policía Nacional.

Nas imaxes pódese ver como cando a policía esta realizando unha detención, un individuo, M. J. M., lanza unha patada por detrás á cabeza dun membro do corpo que nese momento forcejea con C. M. J. M., familiar do agresor e que chega a dicirlle a un dos axentes "Voute a matar e a follarme á túa muller". 

O agresor acaba reducido pero no tumulto interveñen polo menos dúas persoas máis lanzando golpes aos axentes, obrigados a usar a forza para defender nunha escena violenta e chea de berros que se resolveu con tres detencións e tres axentes feridos.

Desde SUP aproveitan para condenar "calquera tipo de agresión, física ou verbal" á Policía Nacional, á vez que demandan que sexa declarada "profesión de risco", así como "un aumento de penas por agresión a policías". A continuación, remarcan o papel da Políca Local e Autonómica, lanzando un agradecemento a todos os que colaboraron en sufocar o conflito.

ÍNDICE EN AUMENTO

Fontes do SUP subliñan a este diario que acudiron ao lugar ao ter coñecemento de que estaba a ter lugar unha liorta na vía pública. Tras tratar de interceder e acougar os ánimos no lugar, "onde se atopa con varios individuos bastante alterados", ten lugar a brutal agresión aos axentes e danos sobre os automóbiles da Policía Nacional, aos que se dirixen con insultos como "fillos de puta" ou "comerme a polla, este é o DNI que vos ides a levar" cando requiriron a un dos investigados a súa identificación, tal e como consta no ateigado policial ao que tivo acceso Galiciapress.

"Por desgraza cada vez son máis os incidentes relacionados co consumo de sustancias estupefacientes e alcol", lamentan desde o sindicato, considerando que está relacionado con este episodio de agresión a policías nun contexto no que aumentaron considerablemente este tipo de sucesos que deixan ás autoridades feridas. 

Ao tempo, desde SUP apuntan que os axentes agredidos "están a se recuperar" e fan fincapé na necesidade de reforzar aos persoais con máis efectivos, "tanto en medios materiais como humanos" e unha actualización do catálogo. "A ascendencia é moi perigosa. Vemos que é moi difícil manter a seguridade dos cidadáns de Pontevedra se seguimos traballando nas mesmas condicións", conclúen.