A Xunta critica ao PSdeG por "críticas buxán" ante a xestión da violencia de xénero

A Consellería de Política Social instou ao PSdeG a "deixar de facer críticas buxán e sen fundamento" sobre a xestión do Goberno galego en materia de violencia de xénero porque, tal e como sinalou, "só demostran a súa ineptitude e falta de rigor".

Nun comunicado, a Consellería respondeu así ás declaracións da secretaria de Igualdade do PSdeG, Silvia Fraga, que reclamou este domingo ao PP que "deixe de blanquear a violencia de xénero" e de "relativizar a súa gravidade cando os presuntos agresores son membros do partido".

"Acusar á Xunta do "declive" das políticas é faltar á verdade e negar o evidente, por iso, aclarámoslle que o próximo ano o Goberno galego destinará 55 millóns de euros para as políticas públicas de igualdade e loita contra a violencia de xénero, unha cifra que ademais é histórica", detallou a Consellería.

Así mesmo, lembrou aos socialistas que "nos últimos anos reforzáronse os centros de información á muller e, nas próximas semanas, poranse en marcha os CIMs móbiles que darán servizo ao rural e aos campus universitarios".

Á vez que fixo fincapé en que se aumentarán os recursos de protección que conforman, entre outros, a Rede Galega de Acollemento "e que o próximo ano contará cunha nova casa en Santiago de Compostela para vítimas con problemas de adiccións".

"Neste sentido, queremos lembrarlle ao Partido Socialista que o único que "blanquea" a violencia machista é o Goberno de España. É intolerable que a día de hoxe, tras dous fallos catastróficos do sistema Cometa, a Ministra de Igualdade non dea respostas e mesmo chegue a asegurar esta semana que non se pode descartar que haxa máis problemas que afecten a estas pulseiras de control telemático", reflexionou.

Con todo, afeou ao PSdeG que "blanquear a violencia de xénero é aprobar unha lei como a do 'só si e si', que deixa na rúa por centos de agresores; e, por suposto, reducir como fai o Goberno central a presenza policial, que é un alicerce fundamental nesta loita, é tamén blanquear a violencia de xénero".