Besteiro disfrázase de 'Robin Food' para despedir o ano

'Na cociña con Besteiro', así se titula o vídeo que subiu ás súas redes sociais para despedir o ano o candidato do PSdeG á presidencia da Xunta, Xosé Ramón Gómez Besteiro, no que prepara unha receita do cociñeiro David de Jorge, coñecido como Robin Food.

Trátase dun pito marinado cun ingrediente "sorpresa", varias onzas de chocolate negro, que o político lucense explica paso a paso como realizar para a cea de Noitevella desde a cociña da súa casa.

Ademais, explica, realízaa empregando todos os produtos galegos a excepción do chocolate. No transcurso do vídeo, menciona que utiliza, por exemplo, mel do Valadouro.

O vídeo compartido nas súas redes sociais foi respondido polo propio autor da receita, Robin Food, que felicitou a Besteiro e desexoulle un feliz ano novo.