VÍDEO | Vandalizan numerosas sedes do PPdeG nun ataque nocturno coordinado

As sedes atacadas foron, polo menos, as de Santiago, Ourense, Sada, Lugo e Gondomar, segundo figura nun correo electrónico con fotos enviado aos medios de comunicación. Nesa comunicación indícase que os carteis non levan a firma de ningunha organización.

Galiciapress confirmou con fontes oficiais do Partido Popular de Galicia os actos de vandalismo, aínda que aínda están a identificar a lista completa de locais afectados. A reivindicación incluía o local de Ferrol pero esta sede non recibiu sabotaxe, segundo o partido. O PP prepara nestes momentos unha nota de condena e na capital galega a agrupación local fala de "unha escalada preocupante de señalamientos e ataques que non poden normalizar", dirixindo o foco á alcaldesa, Goretti Sanmartín.

Os remitentes da comunicación sobre a sabotaxe culpan ao Partido Popular de ser o responsable da crise medioambiental en Galicia, en referencia á gran vaga de incendios que arrasou sobre todo a provincia de Ourense e o sur de Lugo. Táchano de "Partido Pirómano" que leva "17 anos queimando Galiza". 

A comunicación indica ademais que estes carteis levan tempo aparecendo nas rúas de varias cidades galegas —por exemplo, na zona vella de Santiago de Compostela—, criticando o que cualifican como "políticas anticlimáticas". 

A vaga de incendios do pasado verán deixou miles de hectáreas calcinadas en Galicia, unhas 170.000. Foi a maior da historia. Arderon decenas de casas, moitas habitadas, e obrigou a activar numerosos desaloxos. Os lumes, alimentados polas altas temperaturas, o abandono do rural  e a seca, provocaron importantes danos medioambientais, económicos e sociais.

A xestión política da crise xerou unha intensa polémica, con acusacións cruzadas entre partidos sobre a prevención, os medios dispoñibles e a resposta institucional. No centro do debate segue o modelo forestal e as políticas medioambientais aplicadas na comunidade.