O PSdeG ve en Ribeira de Piquín un "exemplo" coas súas medidas contra o despoboamento

A secretaria de Organización do PSdeG e deputada autonómica, Lara Méndez, puxo como "exemplo para os pequenos concellos" as medidas que está a despregar o alcalde socialista de Ribeira de Piquín, Roberto Fernández Rico, co fin de fixar poboación.

Méndez visitou o municipio lucense con motivo dunha xornada de transferencia de boas prácticas á que asistiron rexedoras e rexedores de Asturias para coñecer as iniciativas que se están desenvolvendo alí e "buscar sinerxías".

Xunto a eles coñeceu a piscifactoría que se puxo de novo en funcionamento no lugar de Santalla a través da Fundación Municipal Terreo, coa colaboración económica da Deputación luguesa, e na que na actualidade se crían troitas.

Durante o percorrido achegouse ao polígono agroecológico de Montefurado, que se centra no cultivo de kiwis, e á explotación de porco celta xestionada a través do Grupo Operativo Forescelta.

Tamén tivo oportunidade de comprobar os pasos que o Concello está a dar para recuperar a actividade da antiga gasolineira, e compartiu tempo con membros da ONG Rescate e as persoas refuxiadas que participaron durante os pasados meses no seu programa de atención humanitaria.

"Son proxectos impulsados polo Concello para facer prosperar o territorio e brindar oportunidades económicas á xente, aínda que moitas veces se poñan en marcha asumindo competencias impropias e con moitas dificultades máis aló das económicas", comentou en referencia aos impedimentos "administrativos e burocráticos que en non poucas ocasións teñen que superar as administracións locais".

"A Xunta, que tería que estar a potenciar iniciativas ou dando facilidades, non o fai", apostilou. Sobre isto, indicou que a lexislación "contempla instrumentos que poderían facilitar o asentamento de proxectos no rural, pero non se desenvolven".

"Desde aquí, quero instar o Goberno galego a que asuma as súas competencias, promova iniciativas deste tipo en pequenos concellos e que, cando un alcalde dá un paso adiante para pór a andar ideas que xeran emprego e riqueza, almenos facilite ese labor", reclamou.