Pontón ve ao PP "convertido nun perigo para a saúde" e chama a participar na manifestación do domingo

A portavoz nacional do BNG, Ana Pontón, instou aos galegos a participar este domingo na manifestación convocda por SOS Sanidade Pública en Santiago ante un goberno do PP que "está convertido nun perigo para a saúde".

En declaracións aos medios este sábado, durante a xornada 'AN-PG, 50 anos de alternativa nacionalista', Pontón fixo este chamamento á cidadanía para que acudan á protesta ante os "recortes e privatizacións" no Servizo Galego de Saúde (#Sergas).

"Temos que mobilizarnos para defender unha das grandes conquistas sociais, a sanidade pública, que durante estes últimos 16 anos leva soportando recortes e privatizacións que ao final quen os paga é a cidadanía", sentenciou.

Pontón mencionou, entre outros motivos para manifestar, as "listas de espera" para ir ao médico de cabeceira, os "11.000 nenos e nenas sen pediatra" en Galicia e unhas demoras na atención hospitalaria que "son superiores" a antes da pandemia da covid.

"En definitiva, estamos a ver como o Partido Popular quere deteriorar o público para beneficiar o privado e é fundamental que mañá (este domingo) haxa unha gran resposta social que diga que a sanidade pública non se toca", insistiu.

Preguntada sobre as agresións que sofren profesionais do Sergas, que nos últimos meses saltaron á actualidade, a líder do BNG respondeu que "o propio persoal" di que "unha parte desa conflitividade que se vive ten que ver con recortes, coa falta de medios e coa desesperación que teñen moitas persoas" cando acoden ao Sergas e atópanse con listas de espera "que en moitos casos supera o ano".

"O único que temos son anuncios que non se verifican e sobre todo o negacionismo de que os recortes teñan consecuencias na saúde das persoas", remachou Pontón.
 

CINCUENTA ANIVERSARIO DA AN-PG

Doutra banda, Ana Pontón participou este sábado na conmemoración do 50 aniversario da Asemblea Nacional Popular Galega (AN-PG), desde onde reivindicou a autoorganización e a unidade do nacionalismo. Grazas a iso, dixo, agora o BNG está "en condicións de liderar Galicia".

Pontón sinalou que o que é o Bloque é "resultado do esforzo e do compromiso dunha xeración que, en tempos de ditadura, teceu unha rede de organizacións nacionalistas" que fixo da AN-PG unha "referencia esencial" na evolución do movemento.