Batalla polo liderado do PSdeG: Besteiro e Cabaleiro prepáranse para o duelo

O Partido Socialista de Galicia (#PSdeG) atópase na antesala dunha posible contenda interna polo seu liderado. José Ramón Gómez Besteiro, actual líder do partido, disponse a presentar hoxe a súa candidatura -será ás 11 na Alameda de Santiago- para o próximo congreso, mentres que Gonzalo Caballero, representante do sector crítico, baralla tamén lanzar á carreira pola secretaría xeral que xa ostentou no seu día.

A Comisión Executiva do PSdeG propuxo celebrar o 15º Congreso Nacional do partido o fin de semana do 8 e 9 de marzo de 2025, coincidindo co Día Internacional da Muller. Este congreso perfílase como un momento crucial para definir o rumbo do partido tras os recentes reveses electorais.

Besteiro busca consolidar o seu liderado

O actual líder, o lucense José Ramón Gómez Besteiro, quen liderou a candidatura socialista nas recentes eleccións autonómicas, preséntase como o candidato de continuidade. O secretario xeral leva semanas percorrendo o país para promocionar a recolección de avais e explicar o seu proxecto á militancia.

A súa decisión de competir pola secretaría xeral chega nun momento delicado para o partido, tras a perda de cinco deputados nos comicios galegos do pasado febreiro. Con todo, hai que ter en conta que Besteiro conta co firme apoio de Ferraz. En Galicia, ademais, a práctica totalidade da cúpula socialista tamén está co ex-presidente da Deputación de Lugo.

O sector crítico reorganízase

Pola súa banda, Gonzalo Caballero, ex secretario xeral do PSdeG e líder do sector crítico, está a considerar seriamente presentar a súa candidatura. O vigués non confirmou as súas intencións, poida que debido á dificultade de lograr as máis de mil firmas necesarias para ser proclamado candidato. Agora ben, Cabaleiro leva semanas activo na vida interna do partido, sinalando por exemplo a recente enquisa de Sigma 2 que prognostica que os socialistas galegos perderían outro deputado de dipustarse agora unhas autonómicas.

Cabaleiro mantivo unha postura crítica coa actual dirección e podería representar unha alternativa para aqueles militantes que buscan un cambio na estratexia do partido. O ex-líder do PSdeG PSOE entende que a actual dirección lonxe de levar ao partido ao primeiro posto da política galega, está a conducilo á irrelevancia entre outros factores pola elección inadecuada de candidatos a nivel provincial. 

En definitiva, o próximo congreso do PSdeG celebrarase nun contexto de profunda reflexión dentro do partido.  A apertura do prazo para presentar candidaturas marca o inicio dun período que promete ser intenso no seo do socialismo galego. A militancia terá a última palabra nun proceso que definirá o futuro inmediato do PSdeG e o seu papel na política galega.