Ana Pontón pide un "novo status" para Galicia fronte a unha Constitución que "limita" e "nega" os seus dereitos

A portavoz nacional do BNG, Ana Pontón, reclamou un "novo status" para Galicia fronte a unha Constitución española que "nega" e "limita" os seus "dereitos", "pon obstáculos ao desenvolvemento e benestar dos galegos" e "consolida" unha "institución tan anacrónica e antidemocrática como a monarquía".

"Non podemos celebrar unha Constitución que nos nega", aseverou Pontón, apoiada pola recentemente renovada dirección do Bloque, no acto celebrado no Panteón de Galegos e Galegas Ilustres no que a formación frontista conmemorou a fundación o 6 de decembro de 1931 do Partido Galeguista.

Durante a súa intervención, a líder nacionalista ha reinvidicado o legado de Castelao, de cuxo "ideario" o BGN sente "herdeiro". "Temos a certeza de que chegará o momento en que se recoñeza o dereito soberano das nosas nacións", subliñou Pontón en alusión á declaración fundacional do Consello de Galicia, o goberno no exilio impulsado por Castelao desde Arxentina.

"Galicia é un pobo con historia propia, por iso este 6 de decembro lembramos de onde vimos, lembramos o camiño que iniciaron os homes e mulleres do Partido Galeguista", sinalou Pontón, que incidiu en que o BNG reclama cada 6 de decembro "democracia plena e o recoñecemento de Galicia como unha nación que ten dereito a un autogoberno real".

Fronte a isto, contrapuxo a celebración do Día da Constitución, un texto que "tentou deixar todo atado e ben atado" que, segundo Pontón, apontoa á monarquía e "consolida un modelo de espolio que se pode aplicar tamén para explicar a desaparición das caixas, o déficit de infraestruturas, o boom eólico depredador ou a ameaza de proxectos como a macrocelulosa de ALTRI ou a mina de Touro".

E para camiñar nesa dirección o Bloque defende "un novo status político de nación que blinde capacidade plena de decisión en ámbitos crave para o desenvolvemento económico, social e cultural do país, sen interferencias centralistas, un novo status que incorpore un concerto económico, que permita que a chave do diñeiro de Galicia estea en mans da cidadanía galega e non en Madrid", destacou a líder do BNG.

"O obxectivo do BNG é loitar contra ese modelo depredador coa mesma forza que o facía o Partido Galeguista de Castelao e Bóveda", reiterou Pontón, que situou ao Bloque como "unha alternativa solvente" que pon "cada día máis nervioso" ao PP, como cre que evidencian "os seus ataques cada vez máis virulentos" cara aos nacionalistas.

Neste sentido, e tras reivindicar que constitúen "unha organización forte, unida, garantía de honestidade e lealdade co país", Pontón concluíu o seu discurso coa mensaxe de que as "ideas" do Bloque teñen "un obxectivo": a construción dunha Galicia "xusta e igualitaria, con futuro".

"Ese é o noso gran reto e, para iso, precisamos trasladar a nosa mensaxe con claridade como facía Castelao coa vaca alimentada por nós e ordeñada polos de sempre. Para cambiar tórnalas e que sexamos nós as donas do que é noso", aseverou.