Plans en familia durante a xornada de reflexión para os candidatos galegos nas europeas
Tras unha campaña máis extenuante do habitual, marcada nos últimos días polas temperaturas estivais en Galicia, os candidatos encaran a recta final rodeados dos seus.
Os plans en familia gañan por goleada na xornada de reflexión deste sábado previo á cita coas europeas do 9 de xuño. De feito, por esta vía optaron case todos os candidatos galegos á Eurocámara, entre eles o socialista Nicolas González Casares, quen foi pai por primeira vez durante a campaña electoral.
O socialista, ademais, prevé dar un paseo pola localidade de Lalín. Tamén o popular Francisco Millán Mon aproveitará para dar un paseo polo centro de Pontevedra, a súa cidade, e tomar un aperitivo en compañía do seu irmán e da súa cuñada.
O outro candidato con orixes galegas en postos de saída da lista do PP, Adrián Vázquez, pola súa banda, terá un plan máis ligado á actividade política e prevé almorzar, sobre as 10,30 horas no Hotel Attica 21 da cidade herculina con interventores e apoderados do PP da Coruña.
Pola súa banda, a cabeza de cartel do BNG, Ana Miranda, pasará a xornada de reflexión descansando e compartindo lecer coa súa familia e amizades no barrio vigués de Bouzas. Sobre mediodía, estará na terraza cuberta do Liceo Marítimo.
Escribe o teu comentario