O Plan de Recursos Humanos do SERGAS debe estar aprobado este ano, di o conselleiro

O conselleiro de Sanidade, Antonio Gómez Caamaño, asegurou que o Plan de Recursos Humanos debe estar aprobado este ano, do mesmo xeito que "a desburocratización da primaria".

Nunha entrevista na Radio Galega recollida por Europa Press, o novo titular de Sanidade considerou que este plan é "unha necesidade prioritaria", xa que sen el "non se pode planificar".

Neste sentido, o conselleiro explicou que un plan de recursos humanos é un instrumento "básico para poder planificar tanto a curto como a medio e longo prazo". "Sen iso, non hai nada que facer", aseverou antes de subliñar que o seu departamento quere ser "ambicioso" para consolidar e analizar "as necesidades e prioridades da poboación".

Así, fixou as metas que se marca para o seu cargo: "Loitar a matar fronte á burocracia, mellorar as condicións de traballo da atención primaria e recuperar a ilusión. Hai moita xente boa no Sergas que está esgotada. Hai que recuperar ese talento e volver ter un sentimento de pertenza, volver ir ao traballo feliz", resumiu.

ATENCIÓN PRIMARIA
Nesta liña, defendeu a súa aposta por unha sanidade pública que teña como base "unha interacción real e eficiente entre a atención primaria e a hospitalaria", para que "a continuidade asistencial deixe de ser un palabro" e impacte "positivamente nos pacientes".

Así mesmo, remarcou que hai que conseguir que os médicos "fagan de médicos, eliminando toda a burocracia". "Calcúlase que o 30 e o 40% dun médico de atención primaria é burocrática. Iso non ten sentido. Necesitamos converter aos médicos de familia nos principais embaixadores da educación sanitaria na nosa poboación", sostivo.

Sobre a integración do Sergas na Consellería, Gómez Caamaño afirmou que obedece a "unha reordenación funcional para mellorar a eficiencia de sistema".

A continuación, defendeu os cambios nas xerencias das áreas sanitarias de Santiago de Ourense. Segundo o conselleiro, os cambios non responden a "unha crítica á súa xestión", senón que "fai falta aire novo". En todo caso, mostrou o seu agradecemento a Eloína Núñez (exgerente da área compostelá) e a Félix Rubial (exgerente da área ourensá).

Por outra banda, Antonio Gómez sinalou que o problema de falta de cobertura das prazas MIR de médico de familia é "un problema do Goberno central" e recoñeceu que "probablemente haberá que modificar a metodoloxía", apostando, apuntou, por "facer esas prazas realmente atractivas".

"MÁXIMA DISPOSICIÓN Ao DIÁLOGO"
Ademais, mostrou a súa "máxima disposición ao diálogo" tanto cos colexios médicos como cos sindicatos. Tamén dixo esperar unha "boa" relación coa oposición, aínda que recoñeceu que a sanidade é "moi atractiva como instrumento de loita política".

"A saúde non é unha cuestión de dereitas nin de esquerdas, é dos cidadáns, que lles interesa que resolvan os seus problemas. Veño falar con todos e de todos e veño facer o que fixen toda a miña vida: defender unha sanidade pública de calidade. Eles están no mesmo; temos que ter puntos de encontro. Máxima dispoñibilidade e máximo diálogo", reiterou.

En canto ás listas de espera, Gómez Caamaño, sen dicir cifras, afirmou que o obxectivo é "melloralas", aínda que destacou que "tampouco son tan malas".

INFORME DE CONTAS
Doutra banda, preguntado polo informe de fiscalización publicado este pasado luns polo Consello de Contas, o responsable de Sanidade insistiu en que o documento "recomenda" e "non ten reparos xurídicos".

En relación aos orzamentos, Gómez Caamaño relatou que se trata de "unha práctica normal", aínda que recoñeceu que "probablemente haberá que mellorar e facer orzamentos máis axustados á realidade".