Feijóo pactou que gobernase o 3º máis votado a cambio de que Jácome non competise con el nas autonómicas

Na cidade de Ourense, Feijóo aproveitou o cambio de cromos entre Jácome -terceiro máis votado nas locais- e Baltar -que perdera a maioría na Deputación- para asegurar que Democracia Ourensá non lle restaría votos nos comicios á Xunta.

Jácome cumpriu  o pacto, pero o pacto a nivel local estalou posteriomente, condenando aos 100.000 habitantes de Ourense a ser gobernados por só catro edís.

Rajoy, Rueda e Puy salguen en defensa da proposta de Feijóo, aínda que o ton xeral non é de moito convencemento, máis aló de dicir que é un plan a ser debatido por todos.

A lista máis votada debe gobernar sempre en concellos, deputacións, autonomías e Goberno de España. Esta proposta de Alberto Núñez Feijóo está a centrar gran parte do debate político estatal esta semana. 

En realidade é unha idea antiga. O conservador enarborouna en Galicia en numerosas ocasións. Tamén é certo que nunca a aplicou cando tivo oportunidade. Non hai ningún rexistro de que o PPdeG apartouse de ningún goberno en favor doutro partido a ningún nivel cando Feijóo era o seu líder. 

Feijóo sempre culpou, iso si, aos demais partidos, sobre todo aos socialistas. Neste sentido, o guion que está a aplicar o PP en España é un relato cuxos previsibles xiros argumentais e consecuencias xa coñecen os galegos de primeira man, sobre todo os ourensáns.

DE ALCALDE LETAL A SOCIO

Na cidade de Ourense goberna o polémico Gonzalo Pérez Jácome a pesar de ser a terceira lista máis votada. O encumbró o PP a cambio de que o líder de Democracia Ourensá mantivese á dinastía Baltar na presidencia da Deputación de Ourense. O PP quedouse a un da maioría polos que os deputados localistas podían, potencialmente, desaloxar ao baltarismo.

O sorprendente cambio de cromos chegou a pesar de que Feijóo tachara antes da campaña unha hipotética alcaldía de Jácome de letar para a cidade de Ourense. Unha vez pechado o pacto entre a familia Baltar e Jácome, Feijóo non tardou en bendicilo. 

De paso, el tamén sacou proveito politicamente. A través dunha do seu secretario de organización -Miguel Tellado, hoxe tamén en Genova- arrincou ao localista non presentar nin ás eleccións autonómicas nin ás eleccións europeas.

JÁCOME CUMPRE PERO NON RECIBE O PROMETIDO

Jácome cumpriu. De feito, pediu o voto para Feijóo nas galegas.  Se Democracia Ourensá se presentase ás autonómicas tivese opcións de rascar un escano, algo potencialmente moi perigoso pois a maioría absoluta de Feijóo. Naquel momento era máis exigua que a actual (41 antes e 42 agora, o corte está en 38). 

Cumpriron o PP e Feijóo con Jácome? Cumpriron no inicial, básico e imprescindible, nomealo alcalde. O resto de pacto acabou en papel mollado, en gran medida porque Baltar manobrou fichando a unha ex de Cidadáns para o PP, recuperando a maioría absoluta no pleno provincial.

 Democracia Ouresana xustificou o acordo cunha serie de investimentos para a cidade que hoxe seguen existindo só no papel. Do parque acuático non se moveu nin un gran de area. O Centro de Intelixencia Artificial existe, pero só grazas ao empeño de Jácome, a Xunta pasou del, como quedou en evidencia cando apoiou que A Coruña e non Ourense fose a sede da AESIA. 

Así as cousas, Jácome empezou a lexislatura loando a Feijóo -dixo que lle pediu consellos de xestión- e acabouna dando o pacto por morto e prometendo competir nas próximas autonómicas.

A ESQUERDA GALEGA NON LLO CRE

Con estes antecedentes sobre a mesa,  é normal que a proposta recalentada para o debate estatal haxa suscitado escepticismo, cando non risa, entre os outros partidos galegos.

A líder de Bloque interpreta que ao ex-presidente da Xunta  "non lle dan as contas". Ana Pontón engade que Feijóo  "ten un problema coa democracia" propondo que goberne unha "minoría" no canto de que se forme  unha maioría entre varios socios, que é unha opción avaldaa pola lei electoral cando non hai maiorías absolutas.

Pola súa banda, os socialistas lémbranlle que  "non está en condicións de dar leccións nin de facer propostas de rexeneración democrática". O portavoz do Grupo Socialista na Cámara galega, Luís Álvarez, esperoulle que se tanto cree nesa proposta debería deixar de cuestionar a lexitimidade do goberno de Pedro Sánchez, pois o PSOE foi o máis votado nas últimas xerais.

APOIOS DESDE O PPDEG

Así as cousas, os únicos apoios que suscitou o plan de Feijóo chegan, como era esperable, desde o PP. Un dos seus mentores, Mariano Rajoy, tachou a oferta de "excelente". O pontevedrés lembrou é un plan que ten "anos". Fíxoo durante a súa participación este luns nun acto na Facultade de Dereito da USC:

Alfonso Rueda acompañou ao ex-presidente de España na Facultade. O presidente da Xunta argumenta que non se pode forzar ao PP a aplicar o seu propio plan se o resto de partidos non están de acordo. 

Esta é a clave do argumentario conservador ante o probable fracaso da proposta a nivel estal. A culpa de que non saia adiante non será dos 'populares' -aínda que non a apliquen motu proprio-, será dos demais. De paso, o PP terá un argumento para xustificar pactos que poden resultar agres para parte dos seus electores, como foi o Baltar-Jácome e pode ser o Feijóo-Abascal (Vox).

Pola súa banda portavoz parlamentario do PPdeG destacou, que esta opción "trata de reforzar as institucións democráticas" e de "dar estabilización aos gobernos, sobre todo, no ámbito municipal".  " preséntase como un debate e unha opción a ser valorada pola sociedade española" engade Pedro Puy Fraga.

REXENERACIÓN Ou OPORTUNISMO?

O presidente do PP, Alberto Núñez Feijóo, presentou este luns en Cádiz un plan de rexeneración, que incluirá propostas como deixar gobernar á lista máis votada nos concellos. O PSOE e outros partidos cualificaron de "oportunista" esta medida.

A portavoz do PP Cuca Gamarra cren que o PSOE a rexeita porque temen que Pedro Sánchez quede segundo nas eleccións xerais de final de ano. A ministra de Educación Pilar Alegría respondeu que nin o propio PP créese o seu plan e que hai mútiples exemplos de decisións opostas.

A vicepresenta Yolanda Díaz  (Sumar) e portavoces de Cidadáns, Podemos, Máis Madrid e de Vox tamén a criticaron.